Bangladesh den arrtsü Luchii tashinungbo shibangtsü: Sonowal

Guwahati, Monupii (May) 25 (Agencies): Assam chief minister Sarbananda Sonowal-i Yangtepnü ashiba agi, state kübok India-Bangladesh arrtsü ya taküm Luchii (Dec) tashi nungbo ajunga shibangtsü.
Arrtsü shibangtsüba ya Assam Accord nung clause (9) ka liasü. 1985 küm iba tezüngzüktepba ajanga Assam nungeri küm trok tashi bendanger anema nokdaka aruba tatembang ka dangi bener aru.
2016 küm Aami (June) ita Centre-i Assam nung Indo-Bangladesh arrtsü shibangtsü atema tatembangbuba itaji 2017 Aami (June) asütsü, ta züngzüktsü, saka iba mapa ya tembanga minyaktet.
Sonowal-i ashiba agi, Bangladesh den arrtsü nung atsü atsüba maparen kanga kara inyaka odar.
Paisa tzü nung arrtsü aliba nung non-physical barriers ajanga arrtsü shibangtsü aser ali arrtsü “smart fencing” ajanga shibangtsü.
Iba ajanga ozüng alema Bangladesh nunger senoka aitba dang masü saka arrtsü adena prangbong injang, nashi chang amala shibelenba nokdangtsü, ta paisa ashi.
“Arrtsü shibangtsüba ya election matong tsüngda onok indang tenangzükba ka liasü aser iba maparen ya Luchii (Dec) nungbo tembangtsü,” ta Sonowal-i ashi.
State ajunga nung Citizenship (Amendment) Bill, 2016 anema longkak aitba dak sedakba nung pai nüburtem dang Aami (June) 30 tashi ataa alitsü asoshi mepishiogo kechiyong iba anogo nung NRC tatembangbuba draft sangdongtsü aser iba sülen state nung ozüng alema bendanger kwi lidar aji jangjatsü.
“Nüburtemi memulungba telemtetba ozü sorkari kodanga magitsü. Nüburtem tejangraba masadangi telemtetba kecha magitsü,” ta pai ashi.
Par sorkari ochi mashiba anem nokdakba indang jembidang Sonowal-i ashiba agi, tang teinyakdak IAS office ana aser retired IAS officer ka dena sorkar ketdangser 74 tashi ochimashiba ken o dak sendakba nung par sorkar tashii aruba sülen puogo.
Sorkar kümteter küm ana tsüngda Sonowal sorkari EC Act, kübok mita aoba sentong 3,454 ayongzüka kaogo aser iba kübok shishilembar 99 dang ken o ashishiogo, shishilembar 14 puogo aser trade licences 146 agienogo.