Bangladesh Hindu nunger nem Lisopur jenjang magütsütsü: AGP

Guwahati, Rongchii 13 (Agencies): Assam sorkar kümtetba nung BJP den lokteper aliba telok AGP-Asom Gana Parishad puri tanü ashiba agi, Bangladesh nunger Hindu yimsü dak amangertem nem Centre sorkari lisopur jenjang agütsütsü asoshi benoka aliba ya parnoki kodanga memelatsü.
Osangbenertem den jembidang AGP tir aser Agriculture Minister Atul Bora-i ashiba agi, “Centre-i Bangladesh nung aliba Hindu nungertem India-i anir arua lisopur kümdaktsüner. Onoki iba tebilemdangba ya magizüker kechiyong iba ya 1985, Assam Accord anema lir.”
Assam nung ozüng alema kuli kaket tejangja makai arua alirtem kechi tamangba yimsü dak amanger südirsüang parnok ajak yokatoktsüla, ta Bora-isa ashi.
“Assam lokti ya secular lokti ka lir aser tamangba yimsü dak ajemdaker ozüng alema bendangertem shinga nema jenjang balaka magütsütsü,” ta pai rasaa ashi.
AGP lenirtemi iba ken o dak sendakba nung parnok tebilemba lemsateptsü asoshi Ato Kilonser den ajurutepogo. “Assam nunger taginüba dak kongshira onoki state sorkar kübok minister menden kecha menongnangi dang toktsütsü,” ta paisa ashi.
Maneni Bora-isa ashiba agi, “AGP puri Assam nung National Register of Citizens update asüba anung ozüng alema bendanger arua alirtem shinga tenünga mezüngokdaktsütsü mesera lisopur shinga mezüngdoktsü.”
Taruba küm Lok Sabha aser Assam assembly election atonga agitsü aliba indang asüngdang dang AGP tir-i ashiba agi, “iba dak sendakba nung telemtetba kecha magi tsüngda mezüng kanga junga sensaksemtsü nüngdaker.”