Bangladesh-i Australia den test asaya ayongtsü

Dhaka, August 2 (Agencies): Küm tuko sülen Bangladesh o Australia na October ita nung test series asayamung Bangladesh nung asayatsü renemogo aser iba mapang test match ana asayatsü, ta Deobar nü Bangladesh Cricket Board (BCB) ajanga metetdaktsü.
Board-isa ashiba agi, Australia team ji September 28 nü Bangladesh arua atongtsü aser October 2 nü tashi practice asütsü. Iba sülen October 3 nü Fatullah nung BCB XI den warm-up match ka asayatsü.
Mezüng test asayaji Zahur Ahmed Chowdhury Stadium, Chittagong nung October 9 nü nungi tenzüktsü.
Tatembangba aser tanabuba test asayaji Sher-e-Bangla National Stadium nung October 17 nü nungi tenzüka asayatsü.
Iba asaya ana temer külen October 22 nü Australia nunger pei linüki meyiba aotsü.
2006 küm Australia team Bangladesh-i arudang One-Day Internationals (ODI) asem asayaba nung 2-0 agi koker ao, ajisüaka tan asayatsü asayamung nungbo ODI asayatsü sentong mali.