Bangladesh-i fast bowler Hossain nem tenokdangba agütsü

Dhaka, Yimpoksüi/November 19 (Agencies): Bangladesh Cricket Board-i Mongolbarnü taoba national team fast bowler Shahadat Hossain nem küm pongu tenokdangba agütsüogo. Pai asaya ka nung teammate ka dak teka sangshiba sülen iba tenokdangba ya agütsü.
Deobarnü National Cricket League asaya ka nung Shahadat-i par team mate ka dak amaba sülen tetsüng agi metsüba umpire temi metetdakja liasü.
National federation-i tenokdangba agütsür aliba küm ana agintsüogo saka Shahadat, shibai iba mapa inyakba nangzükogo, pa dang senchi sen 300,000 taka ($3,540) achiba board-i metetdaktsü.
Arishi küm 33 tain Shahadat-i Dhaka aser Khulna na tsüngda asayaba mapang bowler Arafat Sunny Jr dak azük. Tena ball meyushitsüba dak sendakba nung mangatettep adoka asatepba sülen Shahadat-i pa dak azük, ta board nung ketdangser kati ashi.
“Taoba mapang pa yimya yimpong dak ajemdaker onoki pa küm pongu merenshitsü lemtet. Ajisüaka tatembangbuba küm ana suspend süa ataa alitsü,” ta BCB technical committee tekolakba Minhajul Abedin-i ashi.
Shahadat nem taküm tepeyong asoshi tenokdangba agütsür lila.
Shahadat shibai Bangladesh team nungi Test 38 aser one-day internationals 51 nung asayaogo, pa 2015 küm ita ana tashi sabanga ayu. Pa aser kinungtsü nati arishi küm11 tain kilir ka rishikangshiba atema aitsüba sülen pa nem temerenshi agütsü. Ajisüaka obendangba mapang tena meden.
Maneni 2018 küma Dhaka nung rickshaw kati pa indang gari nung atsükba sülen Shahadat-i gari anisang dak azükba atema pa osang kakettem nung kanga bulua adokogo.