Bangladesh-i India ket nung telungpur 5 agütsü

Guwahati, November 9 (Agencies): Manipur aser Nagaland nungi telungpur telok balala züngsem 5 tashi Bangladeshi police-i Assam Police ket nung agütsüogo.
Parnokji Bangladesh nung küm 13 tepuokdak ayuba sülen Assam police ket nung agütsü, ta Silchar nung police ketdangser kati ashi.
“Bangladesh police-i Sutarkandi arrtsü adena Assam Police ket nung telungpur 5 ji agütsü. Tang Assam Police aser intelligence ketdangsertemi parnok dang asüngdangya südar” ta Karimganj police ketdangser Gaurav Upadhyay-i ashi.
2004 küm par punguji Bangladesh kübok Sylhet district nung aliba Kulaura arrtsü nung apu. Parnok ket nung tapoktsütem bena liasü aser parnok aija tepuokdak ayu ta Bangladesh police-i ashiba osang Upadhyay-i metetdaktsü.
“Par punguji arishi küm 40 shi lir aser parnoki police dang parnok telungpurtem masü ta ashi” ta paisa shisem.
Assam Police-i par punguji Manipur aser Nagaland Police ket nung agütsütsü. Par pungu rongnung pezüji Manipur nung People’s Liberation Army (PLA) züngsemtem lir saka kajibo memetet.
Taoba mapang Bangladesh-isa India ketdangsertem ket nung northeast telungpur lennir aika agütsüogo.
Parnok rongnung United Liberation Front of Asom (ULFA) lennirtem- Anup Chetia (2015) aser Arabinda Rajkhowa (2009) aser outlawed All Tripura Tiger Force (ATTF) tanishir Ranjit Debbarma nungertem dena lir.
India kübok northeast state pezü- Tripura (856 km), Meghalaya (443 km), Mizoram (318 km) aser Assam (263 km) temi Bangladesh den arrtsüa lir.