Bangladesh-i Islamist lenir, Nizami tepseta merenshiogo

Dhaka, May 11 (Agencies): Bangladesh-i Islamist yimtenren telok, Jamaat-e-Islami lenir, Motiur Rahman Nizami tepseta tanü, Bodbar nü merenshiba ajanga Bangladesh tesem aika nung nüburtemi jashia longkak aittepba osang jangjaogo.

Tesüiba mapang, 1971 nung Pakistan nungi nüchiso ngua Bangladesh linük tasen tentettsü asoshi tongpang raradang tamangba yimsü, kin kidong aser yimtenren tangatetbaren nung ajemdaker khen nung nisung jenti tepsetba ken o nung aitsüba sülen Nizami nem tasüba temerenshi agütsü.

Special Tribunal-i agütsüba tasüba temerenshi agütsütsü obendang tanaben reprangshitsü asoshi Nizami-i benokba ken o Bangladesh nung tentetba Supreme Court-i magizüktsü lemtet aser pa Dhaka Central Jail nung tanep anepongi lisü agi alenseta südakja merenshi.

Bangladesh opposition lenila, Khaleda Zia-i tesüsa, 2001-2006 tashi Bangladesh Ato Kilonser abenba mapang minister menden abensang, arishi küm 73 tain Nizami nem tasüba temerenshiji 2014 küm agüja liasü.

Bangladesh Ato Kilonser, Sheikh Hasina-i 2010 küm War Crimes Tribunal tentetba sülen tanü tashi nung Jamaat-e-Islami lenir 4 densema, opposition telok yimsüsür 5 tashi tesüiba mapang ozüng alema inyakba ken o nung aitsüba sülen tasüba agi merenshiogo.

Bangladesh nung tentetba War Crimes Tribunal-i alima jenjang nung tentetba okadak yimya mebenshiba olen ka alima jenjang nung tentetba nübur temeten asoshi nokdakba tentettemi metetdaktsüogo saka Bangladesh sorkari iba olenji magizüki lir.

Ano külen, Nizami tepseta merenshiba sülen Bangladesh nübur meyirijang aikati Dhaka yimti yimdong nung sentepa tanü, Bodbar nü pelatepa osanga angazükogo.

“Tanü anogo ya ajurutsü asoshi onoki küm 45 tashi ata liasü aser tanübo aibelener nem tapet temerenshi agütsüogo,” ta Bangladesh nüchiso asoshi tongpang rarar mongin, Akram Hossain-ia metetdaktsü.

Ajisüaka, Hasina’er yimtenren jenjang tajungba kümdaktsütsü nükjidong nung War Crimes Tribunal-i Hasina anema nokdakba yimsüsür aser lenirtem merenshir ta Jamaat-e Islami lenirtem densema, opposition teloki mepelaba olen ka metetdaktsüogo.