Bangladesh-i opposition lenila, Khaleda aputsü ozüng agütsür

Dhaka, March 30 (Agencies): Bangladesh nung tentetba okadak kati taoba Bangladesh Ato Kilonser aser opposition lenila, Khaleda Zia aputsü ozüng agütsüogo.

Dhaka yimtiba nung longkak aittsü sentong ka yaküm January ita agidang petrol bomb amshia bus gari ishika amakba ken o nung ajemdaker okadaki Khaleda aputsü ozüngji agütsü.

Khaleda den külemi, lai aniba Bangladesh Nationalist Party (BNP) lenir aser züngsem 27 tashi aputsü ozüng okadaki agütsüba osang jangjaogo.

“Khaleda aser lar BNP züngsemtem anema benokba pokshiba lendong atalokdaktsüba ken o nung ajemdaker parnok aputsü ozüng okadaki agütsüogo,” ta Bangladesh public prosecutor, Shah Alam Talukdar-i osang jangjashitsü.

Bangladesh Ato Kilonser, Sheikh Hasina-i aniba sorkar jireptsütsü nükjidong nung BNP teloki khubena garitem mesenzüdaktsüi nokdangba den külemi, yimti yimdong nung longkak aita petrol bomb pokdakja lendong atalokdaktsüba ajanga ishiba agi nisung 120 shi asüba aser nisung noklang aika yaküm küm tetenzüklen yirutsüba osang bushiteta lir.

Ajisüaka, arishi küm 70 tain Khaleda-i la aser lar nütsüngtemi aibelena meinyak ta shia, parnok anema benokba ken o ji magizüki lir.