Bangladesh-i ULFA tanishir Anup Chetia India ket nung agütsüogo

New Delhi/Guwahati, November 11 (Agencies): Tesüiba küm 17 tashi Dhaka jail nung puoka ayuba sülen Bodbarnü United Liberation Front of Asom (ULFA) tanishir, Anup Chetia India-i anir aruogo.
Anup Chetia indang tenüng shitakbabo Golap Barua lir aser tanep Bangladesh-i India nunger ketdangsertemi ket nung pa agütsü.
Arishi küm 48 tain Chetia ya ULFA founder general secretary lir aser tanep Bangladesh arrtsü nung pa den külemi teyariteper ana Indian security agencies ket nung agütsüogo.
Prime Minister Narendra Modi-i Bangladesh den iba onük jembiba ajanga Chetia India-i anir arutet ta osang kar ajanga ashi.
Tanü Narendra Modi-i Bangladesh prime minister Sheikh Hasina den phone ajanga kiralongraba anema rara nung yaritepba atema pelaba lemsatepogo.
Küm 20 jungnüa India-i Bangladesh dang Chetia India-i anir arutsü atema takhangba agütsüyonga aru saka Bangladesh nung sorkartem melentepa arudang linük ana tsüngda ‘Extradition Treaty’ maliba onük nung ajemdaker pa India ket nung agütsütsü memulungi liasü.
Tatem nung Sheikh Hasina’er sorkari Chetia India nem agütsütsü telemtetba agi. Chetia-i pa India-i aotsü mulunga lir ta tezüluba nung agütsüba sülen iba mapa ya inyak, ta osang ajanga ashi.
ULFA nung founder general secretary Chetia ya 1997 küm Bangladesh nung apu. Ozüng alema arrtsü adena senzüba, tiyazü passport amshiba aser ozüngi memelai bendanger sen ayuba onüktem nung aija pa tepuokdak yua liasü.
Chetia-isa December 7, 2008 nung UN dangi shidi ka nung pa Bangladesh nung political asylum atema zülu saka iba temepishibaji magizük.
Ajisüaka, ULFA co-founder Arabinda Rajkhowa meyipa aruba aser Centre den ULFA (pro-talks) faction olemtep tenzükba sülen, Chetia-i asylum meshia züluba shidi meyipa agi.
November 30, 2009 nung Rajkhowa-a Dhaka anasa apu aser pa India ket nung agütsü, saka January 1, 2011 nü pa Guwahati Central Jail nungi bail nung chiok.
Tanü Assam Chief Minister Tarun Gogoi-i, ULFA tanishir Anup Chetia Bangladesh nungi anir aruba atema Narendra Modi-i tenüng magitsüla ta metetdaktsü.
Centre aser state sorkartem den tagidak ULFA peace talks nung teyari angutsü atema pai Chetia India-i anir arutsüla ta takhangba agütsüyonga aru, ta Gogoi-i ashi.
“Chetia India-i anir arubatetbaji Modi ajanga masü. Iba ya land bill aser ni ajanga lir. Ni tanen makai mepishiba aser takhangba agütsüba ajanga pa India ket nung agütsü” ta Assam chief minister-isa ashi.
Gogoi-isa ashiba agi, Chetia Assam-i anir arutsü atema pai Centre sorkar dangi temepishiba shidi ka zülutsü.