Bangladesh kaketzülur & tesayurtemi Dhaka yimti yimdongsüa jaja

Bangladesh yimtiba, Dhaka nung tanü Mongolbar nü ayonga agiba yimti yimdongsüa jajaba sentong nung Bangladesh nunger kaketzülur aser tesayurtemi ozülu bener shilem agiba noksa nung angur. (Dhaka, November 03)

 Dhaka, November 03 (Agencies): Bangladesh nunger kaketzülur aser tesayur meyirijang ka shi Dhaka yimtiba yimdongsüa tanü Mongolbar nü jajaogo.

Islamist telok züngsem kari tamangba yimsü dak ajamdaker sorkar anema aser kiralongrabaren inyakba anema ola adoker kaketzülur aser kaket adoktsürtem tawa amakba sülen par linük nung tetsükdakba kecha melii pei tebilemba lemsateptsü temeten agütsüttsü takhangba benoka kaketzülur aser tesayurtemi tanü sentongji agi.

Muslim tamangba yimsü benshir nübur timba aliba Bangladesh linük indang yimsüsütsü tashi tamangba yimsü lenirtem nem bendaktsütsü merangtsü tenzükba aser ano külen, Bangladesh Ato Kilonser, Sheik Hasina-i tamangba yimsü dak ajemdaker tashiyim inyakertem ajunga meshi meshia samatsütsü maparen tenzüka aliba yong Bangladesh nung tang tensa kanga mejungi aliba osang bushiteta lir.

Mejangjatetba nisung kari kaketzülur 2 aser kaket adoktsür 1 nok agi lepsetba sülen ghonda ishika süir külen kaket adoktsür tanga ka Dhaka yimti nungsa nok agi taoba Honibar nü lepseta tensa mejungi kümdaktsüba osanga jangjogo.

Aji oda, kaketzülur aser kaketadoktsürtem amokmerena parnok anema amakba maparen balala inyakaka, tanü Dhaka nung ayongba sentong nung kaketzülur aser tesayur aikati tali tasü itshir shilem agiba osang jangjaogo.

Ano külen, tawa lendong atalokdaktsübaji par züngsemtemi inyak ta shia, al-Qaeda telungpur telok kongsang kati lendong atalokdaktsüba atema tenüng agia metetdaktsüogo.

Tawa lendong atalokdaktsüba ken o nung ajemdaker Bangladesh nung tentetba Ansarullah Bangla Team (ABT) kiralongrar telok bushisüngdangtsü tenzükba olen ka Police Joint Commissioner, Monirul Islam-ia metetdaktsüogo.