Bangladesh Liberation War nung RSS-i Indira Gandhi yari

Shillong, January 24 (Agencies) : 1971 küm Bangladesh Liberation War nung Rashtriya Swayamsevak Sangh (RSS)-i Congress nem teyari agütsü, ta RSS-i Hombarnü metetdaktsü.
Hombarnü Meghalaya yimtiba Shillong nung RSS-i ‘Path Sanchalan’ ta ser India longjemtsü atema agiba sentong nung iba osang metetdaktsü.
“RSS ya nationalist organization ka lir. Bangladesh Liberation War mapang onoki India taginüba ama Prime Minister Indira Gandhi yari” ta Arunachal Pradesh in-charge, RSS pracharak Sunil Mohanty-i osangbenertem dang ashi.
“Yimten mesüra loktitentet shirnoki linük taginüba atema inyakdir, RSS-ia parnok nungita yaritsü, saka Bharatiya Janata Party (BJP)-i linük nung telongjem raksatsüsa mapa kar inyakra, onoki kodaser parnok pusema nungittsü” ta paisa ashi.
Meghalaya nung 2018 Assembly elections dak rangloker Meghalaya nung RSS-i BJP yarir ta Congress minister Zenith M. Sangma-i tawa tai tonglokja liasü.
Yashi Shillong kübok Madan Iewrynghep nungi Gorkha Pathshala Higher Secondary School playground tashi Khasi aser Jaintia kintem nungi RSS züngsem 800 shi kati uniform semer ‘Path Sanchalan’ nung shilem agi.
Netaji Subhas Chandra Bose küm 120 buba ajungba anogomung tenüng nung Shillong nung taküm agi küm anabuba iba sentong ayongzüka agiogo.