Bangladesh: Mi lendong nung nisung 22 rongset; jenti yiru

Bangladesh yimtiba, Dhaka tezülen tentetba factory ka nung mi lendong atalokba sülen lendong nung rongseta asür tasümang ka Bangladesh firefighter ketdangsertemi ki temalen nungi ajungzükdang agiba noksa ka yangi angur. (Dhaka, September 10)

Dhaka, September 10 (Agencies): Bangladesh yimtiba, Dhaka tezülen tentetba factory ka nung mi lendong tesashi ka tanü, Honibar nü atalokba osang ka Police Inspector, Sirajul Islam-i metetdaktsüogo.
“Anüngleni takdang 4 tashi atongtepa asüba factory nung tentetba boiler takdang nung pokshiba lendong ka atalokba sülen tan mi lendongji kanga sashia atalokba osang jangjaogo,” ta pai ashi.
“Tampaco Foils Limited factory nung mi lendong atalokba sülen iba factory nung mapa inyaker nisung 22 shi rongsetba aser nisung jenti yiruba osang tang tashi nung jangjaogo,” ta Tongi State sorkari ketdang asüba mozükidang inyaker doctor, Parvez Mia-i osang jangjashitsü.
Paisa ashiba agi, tan lendong nung densemer nisung aika kanga mejungi yiru aser parnok Dhaka nung tentetba mozükidangi anir oa idakji anepalutsü tenzüka lir.
“Tan lendong atalokdang factory telung nung mapa inyaker nisung 100 shi aliba osang bushitetogo aser parnok karbo tangasa lendong atalokba ki kilung nung alitsü akok,” ta police-ia temulung malemba olen ka metetdaktsüogo.
Tan lendong atalokdak ya süngolio chiyongtsü yangludak aser potato chips o merila mozü aseptsü plastic yangku yangludak aliba osang jangjaogo.
“Tan lendong atalokba den sentakba bushisüngdang sentong agitsü asoshi luden ka tentetogo,” ta Bangladesh factory inspection department ketdangser kati metetdakja liasü.