Bangladesh Military Delegate temi Trishakti Corps semdang

Kohima, Yimpoksüi/November (TYO): Bangladesh nungi military züngsem parnok 20 tashi tang Indian Army, Trishakti Corps anogo pongunü semdangtsü asoshi arua lir. Parnok Yimpoksüi/November 14 nü nungi 18 tashi amungtsü. Military züngsem tem ya Maj Gen AHS Hasan lenisüba kübok arua lir.
Indo Bangladesh arrtsü nung aliba Phulbari BOP atongba sülen parnok Indian Army officers temi agizük aser Darjeeling nung Indian Army station-i meinteper ao.
Parnok India nung amungba mapang parnoki Indian Army, military training dak sendakba nung inyakyim balala indang angazüktsü atema Indian Army formations aser units tem semdangtsü. Maneni parnok nem mountain warfare training indang tangazükba agütsütsü aser HMI Darjeeling densema training institutions balala sayutsü.
Kasa mapang nung parnok atem saisapong aser sobaliba sentongtem renemja lir.
Bangladesh nungi teshimtetba purtemi India semdangba nükjidongji Army ana tsüngda tesendaktep tajungba küma yanglushitsü asoshi lir. Iba amala sentong ajanga tarutsü nung linük ana tsüngda tangatettep tajungba akümtsü. Par telok ya Bangladesh-i Yimpoksüi/Nov 18 nü meyipa aotsü, ta PRO (Defence), Col C Konwer-i sangdong ka ajanga metetdaktsü.