Bangladesh nung ‘Bloggers’ tepseter ka apu

Dhaka, May 2 (Agencies): Bangladesh nung police-i ozüngi nokdanga aliba Islamist telungpur telok nung IT tanishir ka apu.
Iba telok yagi secular bloggers aser gay rights activists aika tepsetogo.
Police-i apuba nisungji Ashfaqur Rahman ta jangjaogo. Pa ya al Qaeda ajanga ajungmesoba telok- Ansarullah Bangla Team nung IT tekolak liasü, ta Bangladesh counter-terrorism police tanishir, Monirul Islam-i ashi.
Rahman ya Ansarullah Bangla Team nung military operations tanishir den tesentaktep tajung liasü. Tanishisangji taoba army major Syed Mohammad Ziaul Haque lir aser 2011 küm sorkar atsüngdoktsü merangba nung pa dak tai tongloktsüba sülen pa jena ao, ta Monirul Islam-isa metetdaktsü.
Rahman ji university ka nung computer science tezüngdak nung telungpur telok nung aden. Teloki tenük yokba bloggers senzüsenbongba pai mita reprang aser parnok indang social media accounts tim mesüi amshi.
February 2015 nungi Bangladesh nung bloggers 5, publisher ka aser gay rights activists ana tepsetba atema ketdangsertemi Ansarullah Bangla Team dak tai tongloktsü.