Bangladesh nung Jamaat züngsem ka alenseta südaktsütsü

Dhaka, July 16 (Agencies): Jamaat-e-Islami nung lenir ka tanü, Brihostibar nü raraba mapang aibelener court ka ajanga alenseta südaktsütsü asoshi obendang agütsüogo.

1971 küm Pakistan den nujiso atema raraba mapang Hindu tsür tashiyim agi raksatsüba aser tepsetba ken o nung pa aija liasü.

Arishi küm 65 tain Forkan Mallik ya ken o ana nung aija liasü.

Hindu tsür ka tashiyim agi raksatsür tepsetba aser tetsür ka tashiyim agi raksatsür tebu den lar kibong nungi züngsem ka dena, par asem tepsetba ken o nung aitsüogo.

Subidkhali Bazar nung Hindu tsür ana tashiyim agi raksatsüba ken o nung Forkan ya taküm piyong tepuokdak ayutsü obendang agütsür liasü.

Pai Awami League nung lenir kar dena nisung pezü tepset aser tashiyim agi tamangba yimsü melendakdaktsüba den Subidkhali Bazar nung alir Hindu nunger asem kinünger nungi piladaktsü, ta obendanger telok jagi ashiba, Dhaka Tribune, osangkaket ajanga metetdaktsü.

Iba obendanger telok ya nisung asem agi akümba telok lir aser parnoki iba ken o ya June 14 nü tembanger obendangdak agütsü.

Iba obendanger telok nungi, Sabina Yasmin Munni-i ashiba agi, iba obendang ya linük-i aginüba ama lir aser court-i iba obendang agütsüba nung parnokia temulung asür.

Rara mapang aibelenba dak sentakba nung Ato Kilonser Sheikh Hasina’er sorkari 2010 küm obendanger telok ana tenteta yutsüba sülen tang agi nisung 15 nem alenseta südaktsütsü obendang agütsür asütsü.

Iba nüjiso rara mapang Pakistan aser Bengal oshi jembirtemi nisüng million asem tashi taküm lalutsü aser iba mapang Jamaat telok ya Bangladesh nujiso anema nokdaker telok ka liasü.