Bangladesh nung Khristantem tetsübu tia ka nung alir

Dhaka, November 27 (Agencies): Küm 30 sülen Pope kati Bangladesh semdangtsü lia iba linük nung Catholic nunger telok tilai Pope semdangba kanga yongyaa atar.
Bangladesh nung Khristan yimsü amangtsübaji kanga dang tasak aser Islamist temi amakba ajanga Khristan lennir aika linük toktsür ogo.
Yaküm Islam nungi Khristan yimsü amanger ana tepset aser Islamist pusemertemi campaign ka inyakdang Catholic shishilembar ka lepset.
Islamist pusemertemi Khristantem dang masü saka Hindu nunger aser tanga telok tilatem anema mapa inyaker.
Bangladesh linük nung nütsüng yongsük million 160 shi lir aser iba nung Khristantemji 0.5% den tajemba lir. Ajisüaka, Khristantemi iba linük nung putu aika Muslim telok tuluba den külemi liyonga arur.
Bangladesh linük indang putiotsü nung Khristantemi tongti shilem agia aruogo aser tanü-a Catholic missionary temi school aser mozü kitem yanglua lir aser item ajanga sensakertem yarir.
1971 küm linük nüjiso atema rarar Bidhan Kamol Rosario ji Catholic nunger ka liasü aser pa ya Portuguese shishilembartem nungi jazükba liasü.
Putu 17 buba nung Portuguese nungertemi Dhaka anasa Nagori tesem nung arua alitsü tenzük.
Tali bilemloka oa amangba Islamist temi tamangba yimsü nung telok tilatem, bendangertem aser secular blogger tem dak tenük yoka mapa inyaker aser iba atema kanga tsübua bilemer, ta Catholic nungertemi ashir.
Yaküm Islamist temi kanga bulua mapa inyak saka ketdangsertemi parnok anema mapa inyaktsü tenzükba sülen kiralongrar aika tepset aser aika pua lir.
Nagori nung aliba Saint Nicholas Tolentino arogo putir Jayanta Gomes-i ashiba agi, Pope-i linük semdangba ajanga tamangertem tesünep angutsü.