Bangladesh nung nisung trok alenseta südaktsütsü

Dhaka, November 08 (Agencies): Bangladesh nung arishi küm 13 tanur ka züksetba ken o nung ajemdaker nisung pezü alenseta südaktsütsü asoshi court ajanga Honibarnü obendang agütsüogo, ta lawyer kati metetdaktsü.
Ano iba sülen kobi melii arishi küm 13 tanursa ka tepsetba ken o nung court-i nisung ana alenseta südaktsütsü ozüng agütsüogo, ta kasa lawyer-isa ashi.
Mezüng tatalokba nung Samiul Alam Rajon züksetba ken o nung nisung ter dak tai tonglokja liasü. Iba ya anüdoklentip tsütsü aliba Sylhet yimti nung atalok. Iba tatalokba nung tan obendang agütsüba angashia court nung alir nisung noklang aika kanga pelatepa liasü.
‘Onoki iba obendang angashia kanga pelar. Samiul’er tsürabura kanga temulung sür alitsü,” ta Metropolitan Sessions Court ajanga obendang agütsüba sülen tanubosanger okatsür Shahidul Islam-i ashi.
“Iba obendang ajanga tanur dak azüker aser tashiyim agi tanur raksatsürtem daka kongshitsü,” ta Islam-a ashi.
Samiul dak bicycle ka auyaba tai tonglokja July 08 nü tongshi ka nung aleneta yur züka merenshi. Iba mapang pai takümbo tesamatsü ta mepishia liasü. Pa tasümang sensaa reprangba mapang pa dak yiruba 64 keta liasü.
Pa tepsetba minute 28 video ka social media ajanga prokshiba sülen nüburtemi aria bilemja pa tepsetertem alenseta südaktsütsü asoshi lungkak aitmeso.
Lawyer sang jagi, tanubosang tepseter rongnung tongti shilem agisang Kamrul Islam den nisung asem alenseta südaktsütsü obendang agütsüogo saka parnok rongnung kabo jenshia senzüdar, ta ashi.
Anünga aliba parnok trok rongnung kar taküm piyong aser kar küm ka ka tepuokdak ayutsü obendang agütsüogo, ta paisa ashi.
Samiul dak azükba video nungji pai, “Imlibilema kü dak yamaibo tezük, ni süadoktsü,” ta ayimtenba angashir.
Tanabuba tatalokbaji Khulna yimti anülulentip tsütsü atalok aser iba ken o nung mechanic, Mohammad Sharif aser pa den külemi inyaker ka alenseta südaktsütsü obendang agütsüogo. Tenati arishi küm 13 tanur ka gari tsüng apuba kol agi apuseta südaktsü. Iba tanur ya tesüiba mapang parnok den külemi inyaka liasü.
Tanur Rakib-i par mapa toktsür tangar mapa nung oa inyakba ajanga workshop kibur Mohammad Sharif kanga jashia pa scü aolen lenmang nung gari tetsüng apuba pipe semkettsür tango apuba kol atemloka yutsü, ta police-i ashi.
“Sharif aser pa den inyaksang Mohammad Mintu nati Rakib tepsetba ajanga Metropolitan Sessions Court-i alenseta südaktsütsü obendang agütsüogo,” ta lawyer Sultana Rahman-i AFP dang ashi.