Bangladesh nung ‘war criminals’ tem alenseta südaktsü

November 22, 2015 : Dhaka, Bangaladesh nung Bangladesh Nationalist Party lennir  Salahuddin Quader Chowdhury aser Jamaat-e-Islami lennir Ali Ahsan Mohammad Mujahid na alenseta südaktsüba sülen Ambulance nung Central Jail nungi bener adokba noksa nung angur. Tena ya 1971 küm nüjiso asoshi raradang aibelenba dak sendakba ken o nung aija alenseta südaktsü.

Dhaka, November 22 (Agencies): 1971 küm Pakistan den Independent asoshi raraba mapang aibelener Bangladesh opposition lennir ana Deobar anepdang alenseta südaktsüogo, ta osangbenertemi ashi.
Arishi küm 67 tain, Salahuddin Quader Chowdhury aser arishi küm 68 tain, Ali Ahsan Mohammad Mujahid na Dhaka central jail nung alenset, ta bdnews24 ajanga ashi.
Attorney General Mahbubey Alam-i, Salauddin Quader Chowdhury aser Ali Ahsan Mohammad Mujahid na alenseta südaktsüba ajanga aibelener ka danga memerenshia meyutsür ta sayur,” ta ashidang, pai, “linük nüburtem anisüngzükba ama onoka anisüngzüker,” ta shisem.
Chowdhury ya tashiyim amshia yimsüsür (dictator) H.M. Ershad-i aniba cabinet nung kilonser ka ama inyaka liasü aser pai Hindu amangertem den Bengal nunger ‘Awami League’ pusemertem tepsetba dak sentakba nung alenseta südaktsü.
Pa ya trokben tashi MP shimogo aser Bangladesh Nationalist Party (BNP) nung lennir ajak rongnung tejenba lir. Pai nübur temeten anema inyakba asoshi tasüba agi merenshi.
October 1, 2013 nü rara nung aibelener (war crimes) bushisüngdangba telok kati tamangba yimsü repranga nisung tepsetba, kiojen rongtsüba aser tangar mezüngmeshiba ken otem nung ajemdaker pa aija alenseta südaktsü. 1971 Liberation War mapang Chittagong nung aliba tebo’er kiji tangar rishikangshia merenshiba ki ka amai liasü, ta obendangeri ashi.
Mujahid-a tesüiba mapang BNP-i linük yimsüsüba mapang kilonser ka ama liasü aser iba den külemi 1971 küm Pakistan-i Bengal nunger nüjiso asoshi rarartem samatsütsü tentetba, Al-Badr telok nung commander ka ama liasü. Iba mapang parnoki nisung telok telok khen nung tepseta entok aser parnoki tepseter rongnung tashi temeteter, scientist aser osangbenertem densema liasü.
Pa alenseta südaktsütsü asoshi July 17, 2013 küm obendang agüja liasü.
Chowdhury aser Mujahid napronglai tena tai mali, ta ashi.
Tan ita tetenzüklen alenseta südaktsütsü aliba Supreme Court-i khen asoshi thinena adar tanü alenseta südaktsürba lir.
Honibar aonung tenati taochi sayutsü asüngdangba Bangaladesh, Tir Abdul Hamid-i magizük.
Tena zünga tang tashi nung Bangaladesh nung war criminal pezü buba alenseta südaktsür asütsü.
December 2013 nung Jamaat-e-Islam lennir Abdul Quader Molla mezüng alenseta südaktsü aser taküm April ita nunga kasa telok nung lennir, Mohammad Kamaruzzaman alenset.
Nisung tepsetertem ozüngi melaba ama merenshitsü asoshi rara mapang aibelenertem anema o akar,” ta Bangladesh sorkari ashi.