Bangladesh nung Zakir Naik indang Peace TV shibangtsür

Dhaka, July 10 (Agencies) : Bangladesh sorkar-i India nung amenoka aliba, nüburtemi tang kanga ashishiba muslim nunger sayutsüngir Zakir Naik indang Peace TV channel Deobarnü shibangtsüogo. Pai iba channel ajanga telungpur ajumesotsüsa o kar jembiba ajanga Bangaladesh nung kiralongrartemi lendong tulu agütsü ta osang angashiba sülen iba channel shibangtsütsü lemtet.
Mumbai nung amenoka aliba iba sayutsüngisang indang ‘Peace TV Bangla’ channel shibangtsütsü ya Law & Order Cabinet Committee senden ka mena lemtet, ta iba senden nung mendenbuba Industry Minister AAmir Hossain Amu-i ashi.
Iba senden nung minister taintem aika den security ketdangsertema dena liasü. Iba sayutsüngiri kiralongrartem ajungmesotsüsa jembisemba metetsü atema Hokolbarnü shia sarasademba mapang pai jembiba o tem kanga junga mita angadangtsü kasa senden nung lemteta yuogo, ta Amu-i osangbenertem dang ashi.
Naik-i jembiba o tem ajanga Bangladesh nung kiralongrartem ajungmeso asütsü ako ta bilemer. Item kiralongrartemi July ka nü Dhaka restaurant ka nung bendanger timba dena nisung 22 tashi pokseta südaktsü.
Islam tamangba dak keta aliba ama kiralongra anema sayutsüngitsü asoshi linük nung aliba Muslim nunger sayutsüngirtem nem sorkari tetuyuba agütsüogo, ta paisa ashi.
Iba senden nung minister taintem den külemi chief of police, Rapid Action Battalion (RAB) nung tekolakba, paramilitary border guard aser security agency balala nungi tekolaktem dena liasü.
Senden nungsa tanga linük-i oset yokba tesem nunga security akhangshitsü atema security talila lemzüktsüogo.
Home Minister Asaduzzaman Khan-i, Bangladesh intelligence agency temi Islam sayutsüngir Naik mitdar, ta yashi Honibarnü metetdaktsüogo.