Bangladesh nungi kiralongrar 5 India telungi aitogo

Kolkata, July 30 (Agencies): Jamaat-ul-Mujahideen Bangladesh (JMB) kiralongrar tajemba agi parnok pongu India telungi aitogo ta melung malemer, aser Rapid Action Batallion (RAB)-i India ketdangsertem nem tenüng agüja aliba rongnung parnok tenüng densema lir.
Bangladesh home minister Asadullah Khan Kamal-i India mesemdangi aliba mapang nungi item tenüng jungkai adoka liasü, aser Brihostibarnü Home Minister Rajnath Singh den senden amendang tenati iba onük ya tongtibang süa jembi, ta osang angazüker.
Item tenüng rongnung Bangladesh nung Islamic State coordinator aser Sylhet telok nungi Canada nunger, Tamim Ahmed Chowdhury densema lir.
Anogo asem tejaklen RAB-i 2011 küm nungi samaba nisung 68 tenüngtem sangdonga liasü aser parnok ajakji arishi küm 15 nungi 40 tsüngdapurtem lir.
Parnok rongnung tajemba agi nisung pongu India telungi aitogo, ta melung malemer.
Bangladesh nung Gulshan amakba sülen West Bengal, Assam aser Meghalaya state tem nung tekümdangtsü sangdonga liasü. Bangladesh sorkari India nem JMB züngsem pongu tenüng agütsüogo aser parnokji India telungi aiter südi, ta osang metetdaktsü.
Ita ana tejaklen Assam police-i Chirang district nung JMB tesep ka makdoka liasü.
India telungi aiter südi ta melung melemi bilemertemji- Tamim Ahmed Chowdhury den Junoon Sikdar, Nazibullah Ansari, ATM Tajuddin aser Mohammad Saifulla Ojaki (Sujit Debnath) nunger lir.