Bangladesh nungi mindokba sülen ‘Crazy pill’ NE nung bulua kümogo

Guwahati, Aami (June) 7 (Agencies): Bangladesh nung Temesepba mozü Yaba (‘crazy pills’) ayokertem indang tesep maka aoba ajanga shishilembatsü mejungi akümba sülen parnok Northeast-i aitsü asoshi merangdar.
“Yaba mozü koba Bangladesh-i bener meiteter item ya state nung ayoker. Bangladesh nung ozüng alema benshiba mozü ayokertem poyonga aoba sülen mozü ayokertemi parnok ket nung aliba mozütem iba tesemi belener,” ta osang ka ajanga metetdaktsü.
Taoba mapang nung methamphetamine-based drug ya Bangladesh-i Northeast ajanga Myanmar nungi shibelena liasü. Taküm küm tang tashi nung Border Guards Bangladesh (BGB) puri Yaba pill 5,297,234 puogo.
Taoba hopta customs division (Guwahati), anti-smuggling unit puri Ganeshguri tesem nung tetsür ka densema Manipur nungi nisung ana ket nungi synthetic drugs aika puogo. Parnoki apuba nung methamphetamine pills 15,720 shi liasü koba sen crore 1.5 shi asütsü. Customs department nungi osang ka ajanga ashiba agi, parnoki shibelener ana ya iba tesem nung aliba local agent tem nem mozü ya agütsütsü lia apu.
Maneni tawaang Meghalaya kübok Garo Hills nung Yaba mozü 4,566 apuba ajanga NE tesem nung iba tebilemtsü tali akümba jangjar.
Yaba pills teti achiba ajanga tepokpok, tezüng aser tekolok nung azü jajaba tezütem raksatsür aser iba ajanga stroke, cardiac arrest asür aser tepu shizüka yoker.