Bangladesh PM Hasina-i April nung India semdangtsü

New Delhi, March 14 (Agencies) : Bangladesh Prime Minister, Sheikh Hasina-i April 7 nungi 10, 2017 tashi India semdangtsü, ta Mongulbarnü metetdaktsüogo.
Küm tenet lir külen Hasina-i India semdangtsü. Prime Minister Narendra Modi-i la jaokba atema lai iba telemtetba agi, ta sangdong ka nung ashi.
Hasina aser Modi na April 8 nü New Delhi nung ajurutepa senden ka amentsü. Hasina-i semdangbaji India aser Bangladesh tsüngda tesentaktep akangshitsü atema lir, ta sangdong nungsa metetdaktsü.
Hasina-i January 2010 nung India tatemsabuba atema semdanga laisü. June 2015 nung Modi-i Bangladesh semdangba sülen lai India semdangtsü.
December 2016 nung lai India semdangtsü sentong yanglu saka Centre-i sen tejentem agienba sülen West Bengal sorkar den mangatettep adoka lia Teesta tzü indang onük mejembitettsüsa akümba agi thinentsüsa aküm.
Taküm February ita Foreign Secretary, S Jaishankar-i Dhaka nung Hasina den ajurutep aser iba sülen Hasina-i April ita India semdangtsü ta Bangladesh-i metetdakja liasü.
Yashi Foreign Secretary Md Shahidul Haque den ajurutepba sülen Indian High Commissioner, Harsh Vardhan Shringla-i ashiba agi, Bangladesh-i iba semdangba ya kanga tongtipang ka ama züngshir.
President Pranab Mukherjee-i Hasina dang Rashtrapati Bhavan nung anenzüktsü atema jaokogo, ta Shringla-isa ashi.