Bangladesh Police-i Dhaka Café amaker ta temulung malemer tepsetogo

Dhaka, August 27 (Agencies): Bangladesh police ketdangsertemi par yimtiba, Dhaka nung taoba July ita lendong atalokdaktsür lenisang ta temulung melemi bilemba nisung tanü, Honibar nü tepsetogo.
“Ozü ketdangsertemi Dhaka yimti tezülen tentetba kiralongrar tesep ka mita aoba sülen Islamist kiralongrar nisung 3 tashi tanü, Honibar nü tepset aser tanü asür rong nung Dhaka nung lendong ataloktsür lenisang, Tamim Ahmed Chowdhury-a densemba osang jangjaogo,” ta tongti police ketdangser, Sanwar Hossain-i osang jangjashitsü.
Dhaka yimti nungi aülulentip tsütsüleni kilometer 25 shi pilar, Narayanganji tesem nung ghonda 1 shi tongpang raraba sülen police-i kiralongrartemji kasetba osang jangjaogo.
“Kiralongrartemi grenade mereploktsüba den külemi, AK 22 rifle amshia, ozü ketdangsertem den tongpang raraba osang jangjaogo,” ta Bangladesh national police lenisang, A.K.M Shahidul Hoque-ia metetdaktsü.
Dhaka kübok Holey Artisan Bakery nung lendong atalokdakja, police ketdangser 2 aser bendanger nisung 17 densema, tashiyim agi pua ayur nisung 20 tashi tepseta maparen nung Bangladesh nung asor Canada nunger Chowdhury-i tongti shilem agiba osang bushiteta lir.