Dhaka, February 22 (Agencies): Bangladesh police ketdangsertemi Dhaka yimti nung temulung melemi bilemba ki ishika taoba hopta tatemlen mita senzüba sülen Islamic kiralongrar ta temulung melemi bilemba nisung 2 tashi apuba osang ka ketdangsertemi tanü, Hombar nü metetdaktsüogo.
Police-i nisung 2 apuba den külemi, bomb 20 shi den bomb yanglutsü osettsüsettema bena aruba osang jangjaogo.
South Asia nung densemba Bangladesh linük nung nütsüng yongsük ajema alir kin nüburtem aser bendanger anema amakba lendong aiben atalokba sülen Bangladesh-i kiralongrar aser telungpur anema raratsü tenzüka lir.
“Dhaka yimtiba aser temeket tesemtem nung ozüng alema inyaker ta temulung melemi bilemba nisungtem atsüka aliba ki 4 shi mita senzüba sülen police ketdangsertemi Ansarullah Bangla Team (ABT) ta ajaba kiralongrar telok züngsem 2 tashi apuba osang jangjaogo,” ta Dhaka police nung deputy inspector general, Monirul Islam-i osang jangjashitsü.
“Ki 4-ji mita senzüba sülen Dhaka yimti kübok kiyong tanga ka nung bomb yanglutsü oset aser bomb-a 20 tashi mima yua aliba osang angazük aser police ketdangsertemi bomb-temji bena arua kasaji tezülen mepokdaktsüi yuogo,” ta pai shisem.
ABT teloki internet nung Islam tamangba yimsü anema osang prokshir nisung ishika tepsetba sülen Bangladesh sorkari yaküm, 2015 küm nungi tenzüka ABT telok ya kiralongrar telok ta züngshir.
Ano külen, tan agiba temulung melemi bilemba ki mitsü sentong agidang police-i osangbenertem ki kilungi meidaktsüi nokdangba osanga jangjaogo.
You must be logged in to post a comment Login