Bangladesh police-i nisung shibelener 20 apur

Dhaka, September 17 (Agencies): Bangladesh police-i ozüng alema nisung shibelener lenisang, Dil Mohammad densema parnok nisung 20 tashi apuba osang ka tanü Brehostibar nü metetdaktsüogo.

Mohammad densema ozünga alema nisung shibelenertemji Myanmar artsülen, Teknaf jila nungi taoba hopta tatembanglen apu ta parnoki metetdaktsü.

“Arishi küm 45 tain Mohammad-i Malaysia toktsür Bangladesh tonga aruba osang angazükba sülen ozü ketdangsertemi pa mita atar külen pa Teknaf jila nung apu,” ta Teknaf police nung inspector, Kabir Hossain-i osang jangjashitsü.

“Bangladesh nübur noklang aika rong nung anir Bay of Bengal ajanga Malaysia o Thailand nati ozüng alema shibelenba ken o nung ajemdaker, ozü Bangladesh den külemi, Malaysia aser Thailand sorkar nati Mohammad aputsü ozüng agüja lir,” ta pai ashi.

Taküm 2015 küm tetenzüklen Thailand nung atalokba Bangladesh sensotem den sentakba migrant timtem tanaben matalokdaktsütsü nükjidong nung police ketdangsertemi mita atar külen nisung shibelenertemji apuba osang jangjaogo.

Myanmar toktsüba Rohingya kin aser Bangladesh sensotem Southeast Asia tonga anir aoba jakdang Thailand linük tezülen tentetba nisung shibelener tesep nung tepseta enokba tatalokba Thailand police-i taküm May ita bushiteta liasü.

Iba osangji bushitetba sülen Bangladesh nunger nisung shibelenertemi atsüka lir külen pei yimtsüng bushia arutsü tenzükba osang bushiteta lir.

“Mei mapang tatembanglen aruba ajanga tzüyim nung senzüsenpongtsü ayonga akümtsü meteta atsüka aliba ozüng alema nisung shibelenertemi par mapa maneni inyaktsü nükjidong nung pei pei yimtsüng tanaben bushia arutsü tenzükogo,” ta Hossain-i metetdaktsü.

Thailand nung nisung shibelenertemi tepseta yutsüba tasümangtem taküm May bushitetba sülen Bangladesh police ketdangsertemi nisung shibelener 4 kasetba aser parnok nisung 90 tashi apuba osanga bushiteta lir.