Bangladesh police-i raradang amshiba oset aika ngutet

Dhaka, June 02 (Agencies): Dhaka anasa Narayanganj yimti nung aliba Rupganj nung nisung-i yangluba awatsüng ka nungi police temi rocket launcher ana aser Chinese-made machine gun 62 densema raradang amshiba oset aika Hokulbarnü ngutet.
Osang kar angazükba sülen police aser fire service gari anishirtemi yariteba iba nisungi yangluba awatsüng nungi Chinese-made sub-machine gun 62, rocket launcher ana, hand grenade 42, fire pistol tem aser injang aika poly bag tem nung alepa yua aliba ngutet aser police temi iba ken o nung asüngdangyatsü atema nisung asen pua lir.
Parnoki tzü aoba lenmang nunga bushidang raraba osettem ya tzü telung nungi aika ngutet.
“Item prangpong aser injangtem ya linük nung timtem agütsütsü asoshi iba tesem nung ya benden,” ta Inspector General, Shahidul Haque-i ashi.
Saka tang tashi nung item raradang amshiba oset ngutetba ken o nung telok mesüra kiralongrar shinga tenünga police temi agüja mali.
Bangladesh indang police headquarter nungi district ajunga nung police tanishirtem dangi telungpur 5,000-shi linük nung lir südi ta temolung melemtetba osang brokshia lir aser iba ajanga police tem tali saksalema kümogo.
Taküm March ita nunga Bangladesh police temi telungpur anema mita bushiba mapang telungpur südi ta temolung melemtetba nisung 17 tepset.