Bangladesh sü adakba factory nung mi adok, nisung aika asü

Dhaka, July 04 (Agencies): Hombarnü Bangladesh nung sü adakba factory ka nung ‘boiler’ ka apok aser iba lendong nung nisung ti asü aser 50 yiru, ta ketdangsertemi ashi.
Bangladesh yimtiba, Dhaka tezülen aliba sü adakba factory nung mapa inyaker aika lia apokba ajanga storey trok tua aliba ki ya poksa aser iba ajanga jara aser kilem ajunga laodaktsü.
“Iba lendong ya tetsübutsü ka liasü. Fire brigade tanishirtem arua bushisüngdang südagi. Factory indang boiler apok aser iba ajanga tanga ki nunga kongshi,” ta police ketdangser, Harunur Rashid-i osangbener dang ashi.
“Nisung ti asü aser 50 yiru. Iba tesem nungi nisung tasümang trok agitet aser mozüki nung ana asü. Iba lendong nung asür ya kar bo iba tesem ajanga süyir liasü,” ta fire service nung deputy assistant director, Mohammad Akhteruzzaman-ia osangbener dang ashi.
Gazipur district nung aliba mozüki balala nung nisung 35 anepalu südagi aser yirur alir ya kar bo mekümzüktettsü südi, ta mozü meteter, Pronoy Bhushan Das-i ashi.
Iba lendong ya Hombarnü nikongdang 7:00 ako (13:00 GMT) meta adalok.
Iba factory ya Hombarnü shibanger, saka nisung kar iba boiler yanglushia liasü, ta iba factory director, Mesba Faruqi-i ashi.
Iba factory ya sü yangluba company, Multifabs indang lir aser iba company ajanga European brand yanglur, ta website nung shia lir.
Bangladesh nung garment factory ya 4,500 dak tali lir aser item factory nung mapa inyaker ya million pezü lir aser parnok ya timba tetsür lir. Item factory nung inyaker nem ita ka nung taa $68 agütsür.