Bangladesh: Tasüba temerenshi ngua alirtemi taochi sayutsü mepir

Dhaka, November 21 (Agencies): Tasüba temerenshi ngua alir tongti Bangladesh opposition lenir anati tena dang taochi sayutsü temepishiba onük ka Bangladesh Tir, Abdul Hamid den tanü Honibar nü benokba osang ka Bangladesh Law Minister, Anisul Huq-i metetdaktsüogo.

Tesüiba mapang, 1971 küm Pakistan anema raraba Liberation War nung ozüng alema inyakba ken o nung aitsüba sülen Fundamentalist Jamaat-e-Islami Secretary General, Ali Ahsan Mohammad Mujahid aser BNP lenir, Salahuddin Quader Chowdhury na tasüba agi merenshitsü obendang agütsüba sülen tena tang tepuokdak puoka lir.

 “Tarutsü mapang nung tepseta merenshitsüpur, Mujahid aser Chowdhury nati taochi sayutsü onük benokogo,” ta Bangladesh Home Minister, Asaduzzaman Khan-ia tanü osang jangjashitsü saka iba onük den sentakba tanga osangbo memetetdaktsü.

Tongpang raradang ozüng alema inyakba ken o nung aitsür rong nung tan Dhaka Central Jail nung puoka alir, arishi küm 67 tain Mujahid aser arishi küm 66 tain Chowdhury na ya Tir dang taochi sayutsü mepir mezüngpur lir.

Bangladesh-i 2010 küm nungi tenzüka tanü tashi nung 1971 Liberation War nung ozüng alema inyakba ken o nung aitsür ana, Abdul Kader Mollah aser Mohammad Quamaruzzama na tepseta merenshiba osang bushiteta lir.

“Linük temzüngi ozüng alema aibelener nisung mashika dang taochi sayua taidok agütsütsü tashi linük Tir nem agüja lir. Ajisüaka, ozü Tir, Hamid-i pa nem agütsüba tashi mamshitsü imlar,” ta State prosecutor, Tureen Afroz-ia tanü metetdaktsüogo.