Bangladesh:46buba Independence Day amung; Linük asoshi taküm bendanga agutsürtem bilemtet

Dhaka, March 26 (Agencies) : Tanü Deobarnü Bangladesh nung 46buba Independence aser National Day benjung sentong metenzük tsüngda tamasa 1971 Liberation War mapang linük asoshi taküm bendanga agüja asür nisung million asem nem akhümtsübu aser tenüngsang agütsüba sentong ka agia liasü.
March 26, 1971 nü Linük Tebu Bangabandhu Sheikh Mujibur Rahman-i March 25, 1971 aonung Pakistan-i force temi hadir ama maliba Bengal nunger amaktsü sentong lazükba sülen Bangladesh nüjiso akaba linük lir, ta ola agütsü.
Ita 9 tashi nisung taküm million asem tashi lalua nüjiso atema raraba sülen India-i nungita December 16, 1971 anogo nung Bangladesh nüjiso angu.
Deobarnü Tir Abdul Hamid aser Ato Kilonser Sheikh Hasina nati Liberation War nung asürtem nem akhümtsübu agüja National Memorial nung narozük yutsü, ta osang ajanga metetdaktsü.
Narozük yutsüba sülen Tir aser Ato Kilonser nati akhümtsübu sayuba temaitsü minute ana ola madoki mokremer nokdak.
Iba sentong nung Bangladesh Army, Navy aser Air Force temi national salute agütsü aser jemji (bugle) apua sentong tembang.
Iba sentong nung Bangladesh Speaker Shirin Sharmin Chaudhury, kilonsertem, Dhaka North aser South City Corporations nungi adviser aser mayor tem, parliament züngsemtem, Army, Navy aser Air Force nungi tekolaktem, nüjiso atema raratem, ambassador tem aser high civil aser military ketdangsertem dena liasü.
Iba sülen party nung lenir tejentemi tang Bangladesh Awami League nung Tir aser linük Ato Kilonser Sheikh Hasina meina oa lar party tenüng nung ano National Memorial nungji narozük ka yutsü.