Bangladesh’er LGBT yimobilem zülur den nisung 2 tepset

Dhaka (Bangladesh) April 25 (Agencies): Bangladesh nung  LGBT magazine senior editor den nisung ana linük yimtiba, Dhaka nung Hombarnü tepsetogo, ta osang ka ajanga metetdaktsü.
Kasa osang ajanga ashiba agi, shi nung kasa o kasa na medemba pusemsangji LGBT magazine ‘Roopbaan’ nung yimobilem zülur lir aser pa US development agency USAID nunga inyakogo.
Ano külen taoba mapang Foreign minister, Dipu Moni’er kinünger ka densema nisung ana Dhaka nung mejangjaba nisungtemi tepsetogo.
Moni’er kinünger Julhash Mannan aser par medemer, Tanay naji Dhaka, Kalabagan nung kidang lia tepset, ta Ramna division police deputy commissioner, Abdul Baten-i ashiba osang Dhaka Tribune ajanga metetdaktsü.
Baten-i ashiba agi, tena tepsettertemji courier ketdangser ama benshia aonung 7:00 ako meta ki telungi aita taoba mapang US embassy protocol ketdangser, Mannan (35) den par medemsangji tepset.
Tawatanü ka nungi Bangladesh nung minority tem, secular ocet zülurtem, kaket zülurtem aser bendangertem tepsetba kanga bulur. Yaküm-a secular ocet zülur nüngtugu nisung pezü tashi nok agi lepset.
Honibarnüa ISIS kiralongrartemi techira oset amshia liberal professor, AFM Rezaul Karim Siddiquee (58) tekonga ranger Rajshahi yimti nung par ki anasa toktsü.