Bangladesh:Hindu amangertem amakba atema jenti apu

Dhaka, November 6 (Agencies) : Telok tulu kati Hindu nungeri tanga tsüngremtem anema inaykyimer ta tai tonglokja parnok tekülemba aser taliba kitem amakba sülen Bangladesh police-i nisung jenti pua lir, ta police ketdangser kati ashi.
“Iba amakba dak sendakba nung tang tashi nung nisung 53 pua lir aser tang lendong atalokba tesem, Dhaka nungi kilometre 109 pilar aliba Brahmanbaria district nung security kanga sashia lir,” ta police ketdangser kati pa tenüng meshii Xinhua news agency dang ashi.
Tangbo iba tensa azüoka lir, ta paisa ashi.
Saudi Arabia kübok Mecca nung aliba Islam amangertem atema temeshitiba tesem, Kaaba, Facebook post ka nung lutsüba sülen October 30, 2016 nü telok tulu kati kanga jashia tajemba agi Hindu nunger tekülemba ki 15 aser kiojen 100 dak tema raksatsü.
Ashiba agi yangji alir Hindu nunger ka tenüng agi, Rasraj Das-i, kaaba telung nung Hindu tsüngrem ka inoka yangluba noksa ka social media nung inoktsü.
Kaaba nung inoka yangluba Hindu nunger tsüngrem noksaji Shiva liasü.
Iba tatalokba dak sendakba nung Rasraj Das pua lir.
Bangladesh police, counter-terrorism teleni iba noksa shibai post asüar ibaji bushitsü tenzükogo.
Iba tatalokba nung Bangladesh Ato Kilonser Sheikh Hasina-i aniba sorkari bushisüngdang balala asem tenzükogo.
Iba lendong tenzükdang duty junga maliba ajanga police tain ka mapa nungi anentsüogo.
Hokolbar anepdang osangbenertemi Hindu nunger ki aika rongdoktsüogo ta sangdongba sülen security talila yoksema liasü, ta kasa ketdangserisa ashi.