Bank account amshia ashioktsür aika kümogo

Kohima, January 28 (TYO) : Tanü asüng Nagaland nung bank account amshia ashikülak mapa inyakba aika adokogo, anungji lendongi maitsüsa item ashikülak mapatem nungi nübortem kanga kümdanga alitsüla, ta SP Crime & PRO, PHQ Kohima, M.Tungoe-i sangdong ka nung metetdaktsüogo.
Nisung kari taila kakettem amshia bank account lapoker aser aji ashikülaka sen amshirtem dang ayoker. Iba ama bank account ayokba aser aliba ajanga ashikülaka inyakba kanga bolua kümdagi, ta paisa ashi.
Nisung karibo bank account ayokbaji nisung tamajungertemi ashikülak mapa nung amshitsü ta memetet ser ayoker, item nisungtem atemaji kanga lendong asütsü. Taila kaket amshia bank account lapokba aser bank account ayokba aser aliba ajakji ozüng raksaba mapatem lir, anungji item mapa nung jagi senso ajak jenbua alitsüla, ta PHQ Kohima nungi SP Crime, Tungoeisa metetdaktsü.
Paisa nübortem dang iba ama lendong aketba mapa inyakba indang tangatetba agüja jembidaktsüner ta metetdaktsü.
Taila kaket amshia bank account lapokba dang masü saka ano ashikülaker aikati nisungtem indang bank account number, ATM card number, Secret Pin aser bank dak sendakba tanga temetettsütem metetnüa asüngdanger, anungji itemji shinga dena melemsateptsüla ta paisa metetdaktsü. Item temetettsütemji asüngdanga phone asütsüa akok mesüra SMS mesüra e-mail arutsüa akok, anungji kanga kümdangtsüla ta paisa metetdaktsüogo.
Item ama lendong majurudang asenoki tangartem nema tangatetba agüja lemsateptsüla aser facebook page- ‘CID, Nagaland’ nunga reprangdangtsü akok ta SP Crime-isa metetdaktsü.