Bank account lapokertem nem sen agütsü

Tinsukia, Aenjetti 3 (Agencies): Assam chief minister Sarbananda Sonowal aser finance minister Himanta Biswa Sarma nati Tentonü (Mongolbar) Tinsukia jila nung sentong ka nung demonetisation sülen süngolu nung inyakertem shirnoki bank accounts lapokogo, parnok ajak nem sen sen meyirejang anaser noklang pongungu (2,500) agütsüogo.
Chah Bagisha Dhan Puraskar Mela ya bank accounts lapoka Digital India nung shilem ka akümba atema süngolu nung inyakertem senpettsütsüba scheme ka lir. Scheme nung shilem ka ama demonetization sülen süngolu nung inyakertem shirnoksa bank account lapokogo parnok nem mezüngbuba instalment ama sen meyirejang anaser noklang pongungu (2500) agütsü.
Sonowal-i ashiba agi, “Tenangzükba balala dang agütsüba ajanga süngolu nung inyakertem nem teyari kecha magütsütsü. Tenangzükba ajak ataloktsütsü asoshi sorkar dak tashi lir. Taoba sorkar ama masü saka onoki tenangzükba balala agütsüba dang masü saka tenangzükbatem inyaktsü, aser Tentonü sentong ya kuli ka lir.”
“Süngolu nung inyakertem ya Assam nung tongtibang shilem ka lir, aser parnoki state rongsenketsüng nung terenlok bener aruba nung tongtibang shilem agir. Ozü sorkari parnok sorkar inyakyim küboki anir aitsü asoshi inyakdar,” ta paisa ashi.
Sarma-i ashiba agi, “Ni Congress sorkar kübok küm 10 tashi finance minister liasü, saka süngolu nung inyakertem atema kecha minyaktet. Tang mezüngbuba BJP sorkari süngolu nung inyakertem sorkar rongsenketsüng aachayangba küboki aniokogo, koba küm 70 tashi sorkar kechia minyaktet,” ta pai ashi.
Sarma-isa ashiba agi, demonetization sülen süngolu nung inyakertem parnok 6,58,250-i bank account lapokogo aser iba atema state sorkari sen crore 182 indoktsü. Maneni ita trok lir külen maneni kasa sen ya agütsütsü.