Bank ketdangser kati ashikülak mapa inyakba atema aija apu

Dimapur, May 23 (TYO) : Vijaya Bank, Tseminyu nung Rs. 88,94,000 tim mesüi agizükba atema April 21, 2016 nü Tseminyu P.S nung branch manager-i ken o ka benok.
Iba dak sendakba nung bushisüngdangdang, Oriental Colony, Dimapur nung alir nisung ka apu aser iba nisungji Nyinpen Yanthan’er jabaso Yichanpemo Yanthan ta jangjaogo, ta Sub-Divisional Police Officer (South) & PRO Kohima-i sangdong ka nung metetdaktsü.
Bushisüngdanga aodang, kibur dang nungi temelaba magii aser memetetdaktsüi Vijaya Bank, Kohima nungi Vijaya Bank, Tseminyu-i Rs. 1,01,71,504 fixed deposit belenba bushitet. Iba fixed deposit nung ajemdaker Vijaya Bank, Tseminyu branch manager, Yichanpemo Yanthan-i kibur indang signature taila amshia loan agizüktsü yanglu, ta Kohima police sangdong nungsa shia lir.
Yichanpemo-i fixed deposit ayuba kibur indang tenüng nung term deposit ajanga Rs. 87,50,000 loan agizük. Iba denji kibur dang nungi temelaba magii aser masüngdangi Tseminyu Branch nung pai saving account ka lapok aser ibaji amshia loan senji agizük, ta police-isa metetdaktsü.
Vijaya Bank nung fixed deposit ayuba kiburi sen belenba osangji metet aser pai pa indang fixed deposit ji agizüktsü asüngdang aser iba jagi Kohima-i belener agizük.
Loan agiba indang security kecha maliba agi branch manager dang loan den interest Rs. 88,94,000 meyipa agütsütsü tetuyuba agütsü aser mapang tatsüka lir sentsühji odokogo ta kuli agütsü. Ajisüaka, jungjunga bushisüngdanga aodang, loan ji tezüluba nungbo odokba sayua liasü saka senpong nungbo sen maliasü, ta Kohima Police-isa metetdaktsü.