Bank nung teintet rogotem nem maongka balaka agutsütsü

New Delhi, November 14 (Agencies): Hombarnü sorkari, ATM nung anogoshia sen 2000 agizükteta aliba nungi sen 2500 kümtsüogo ta metetdaktsüba den külemi Finance Ministry nung ketdangser kati, nüburtemi timtem majangshitsü atema mera kar agiba metetdaktsü.
Item rongnung teintet rogotemi timtem majurutsü atema mera ana agiogo. Mezüngbuba nung bank kongsangtem nung teintet rogotem nokdakba tarensen balaka asütsü, aser tanabuba nung pensioner tem indang annual life certificate agütsütsü aliba atema sangküm January 15 tashi mapang atsülangtsüogo.
Yasüng tezü Ato kilonser, Narendra Modi-i anir Cabinet minister tem aser tongti ketdangsertem senden ka amenba sülen tanü Economic Affairs Secretary, Shaktikanta Das-i item osang metetdaktsü.
Bank nung inyakertem meranga inyakba atema pelaba olen ka nung Das-i, “Tesüiba anogo pezü-pongu nung bank staff tem koma meranga inyakar’ar asenoki nguogo. Parnoki lokti tulu atema ghonda aika inyakogo, khenkhenbo parnok ayaterm nung ang kidangi shilang, aser karbo bank nunga mejang. Parnok mapa tajung atema bank nung inyaker ajak dang pelar,” ta metetdaktsü.