Baptist High Kohima nung November 1, 2019 nü Cultural Day sentong nung shilem agir kaketshirtem tangokba noksa ka yangi angur.
Kohima, Yimpoksüi/November 01, 2019 (TYO): Mission Compound nung Hokolbarnü Baptist High Kohima-i cultural day sentong ayongzüka mungogo, kong Nursery nungi Higher Secondary kaketshirtemi sobaliba temeyoktepba balala indang osettsüset balala sayua liasü.
Cultural day sentong nung school Principal, Keviseto Isrial-i tsüraburtem, kaketshirtem, tesayurtem aser temulungertem pela agizük aser pai ashiba agi, kaketshirtem longjemer sobaliba tsüngsang aser tetsü-tebou kentem tena sayuba ajanga school nung kin temeyoktep telongjem sayur.
Iba denji külemi, onok tsüngda kati ka akümtsüba shisatsü sayur, ta Keviseto-i ashi.
Küm asem nung iba sentong khen ayongzüker, ta shia Kevi-i , iba ama telongjem sentong tulu ayongzüktsü asoshi tesayurtem dak lenir sempet nüngdaker, ta metetdakja liasü.
Sentong takok ngua achaayangba atema Kevi-isa tesayurtem dang pelaba metetdakja liasü.
Maneni, iba cultural day sentong nung Nursery aser Classes A & B kaketshirtemi Angami nunger tetsü-tebou ken tena liasü. Class 12 kaketshirtemi Drama, Classes 1, 2 & 3 kaketshirtemi Zeliang nunger tetsü-tebou ken aten, Class 2 & 3 kaketshirtemi Nepali nunger sobaliba tsüngsanga sayu, Class 5 kaketshirtemi Chakhesang nunger tetsü-tebou ken aten aser Class 4 kaketshirtemi Lotha nunger sobaliba tsüngsanga sayu.
Ano külen, Higher secondary kaketshirtemi sobaliba sübotsütem sayaa (Cultural ramp walk), Class 7 kaketshirtemi Rongmei nunger sobaliba tsüngsang sayu, Class 8 kaketshirtemi Angami nunger sobaliba tsüngsang aser Class 9 aser higher secondary teburtemi Sumi nunger sobaliba tsüngsang tem sayua liasü.
Class 6 kaketshirtemi Sangtam nunger sobaliba ken aser Class 10 kaketshirtemi sobaliba saisapongtem sayua liasü. Item dak alaka, sentong nungsa tognbang rara tetoktepba agia liasü.
You must be logged in to post a comment Login