Barack FC-i 16 buba NSF Martyrs’ Memorial takok marok agizükogo

NSF Martyrs’ Memorial trophy 2015 champions, Barak FC Peren asayartemi Nagaland Parliamentary Secretary, Neiba Kronu aser ASU o NSF ketdangsertem den agiba arok noksa ka yangi angur. (Kohima, October 15)

Dimapur, October 15 (TYO): Defending champions, Barack Football Club, Peren-i Khulioh King, Tuensang telok madak final asaya koka 16 buba NSF Martyrs’ Memorial Football Tournament takok marok tanü Brehostibar nü agizükogo.
Tan agi tanabenbuba atema takok marok atonga agizüktsü maongka anguba Barack teloki tanü goal 3-0 agi King telok final nung tsükdaktsü.
Salu Kulim, Nzauhutbo Nbung aser Kekhrieletuo Tsira nungeri asaya tenzüker minute 11, 29 aser 45 buba nung goal ka ka agüja par Barack telok asoshi tanü takokbaji bener arutsü.
King asayartemia tanü kanga meranga asaya saka par teloki tanü asaya nung goal kata magütsüteti tamakok ajurua liasü.
Barack teloki takok marok aser kuli kaket den külemi, senpet sen 1,60,000 agizük aser King teloki tanabuba jenjang marok aser kuli kaket den külemi, senpet sen 1,00,000 agizüka liasü.
Individual shilem nung King asayar, Nungsang Ao-i Player of the Tournament sempet, Scooty ka agizükba den külemi, Pro-Streax Dimapur telok asayar, Meren den aroki Highest Scorer of the Tournament sempet agizüka liasü.
Ano, Barack asayar, Sanyem Salym-i Best Defense; külem asayar Peisuidibe Zeliang-i Best Goalkeeper aser Senapati FC Manipur asayar Yami-i Best Midfielder of the Tournament sempet agizükba osang jangjaogo.
NSF Tir, Subenthung Kithan-i takok angurtem nem sempetji lemshia agütsü.
Tanü asayamong tembangba sentong nung Nagaland Parliamentary Secretary, Planning & Coordination & Evaluation, Neiba Kronu tongti tesemdanger aser Lajong FC Shillong nung Managing Director, Larcsing M Sawyan tetushi tesemdanger liasü.
Angami Students’ Union (ASU)-i ‘Goal for Peace’ omen nung ajemdaker ita ka tashi ayonga asayaba 16 buba NSF asayamong nung Nagaland aser Manipur na nungi football asayar telok 63-i shilem agiba osanga jangjaogo.