Barak & Addax telok 22 buba Classic Cup quarter-i iogo

Kohima, November 16 (TYO): Barak Football Club (FC), Peren aser Addax FC, Kohima telok nati takok ngua, tang tasayadak 22 buba Classic Cup football asayamong quarterfinal asayatsü jenjang tanü, Bodbar nü ajangzükogo.
Rhitso Mero-i goal 3 tashi agüja, tan asayamong nung hat-trick yanglur asayar 5 akümba densema, tanü mezüngbuba prequarterfinal asaya nung par Barak teloki goal 4-0 agi Lerie Youth FC madak takok angu.
Rhitso-i asaya tenzüker minute 5, 7 aser 20 buba nung goal 3 tashi agüja, par telok temaba jenjang nung ajungkettsüba sülen külem asayar, Nighatu-i minute 51 buba nung 4 buba aser takokba goal agüja, par Barak telok nem takok ngudaktsü.
Addax telokia goal 5-3 agi Tyrants FC telok madak takok ngua, tanabuba prequarterfinal asaya liasü.
Punuru-i minute 11 aser 12 buba nung goal 2 agütsüba sülen Akhrielie-i minute 13 buba goa 1 agüja, par Addax teloki tanü asaya nung minute shia goal kaka atonga agüja kangasa junga asaya.
Tyrants asayar, Viseyie-i minute 17 buba nung goal 1 meyiptsü den külem asayar, Chetso-i minute 55 buba nung goal 1 agüja, par telok jenjang tajungba kümdaktsü.
Ajisüaka, Neikethozo-i minute 57 buba nung goal 1 agüja, par Addax telok maneni jenjang tajungba kümdaktsüba sülen Punuru-i minute 60 buba nung 5 buba goal agüja, tan asayamong nung hat-trick yanglur asayar 5 buba aküm.
Meyiezo-i minute 62 buba nung par Tyrants telok asoshi 3 buba goal agütsü saka tanüngba asaya mapang nung tanüngba goal 2 memeyiptsütetba yong par teloki tanü tamakok ajurua liasü.
November 17 nü asaya yamai alitsü:
1. Elite FC vs Boys FC @ 1:00pm
2. Adroit Boyz Sechü Zubza vs Head Hunters @ 2:30 pm