Barak FC 22 buba Classic Cup final-i iogo

Kohima, November 26 (TYO): Defending champion, Barak Football Club (FC), Peren teloki semifinal asaya koka, tang tasayadak 22 buba Classic Cup football asayamong final asayatsü jenjang tanü, Honibar nü ajangzükogo.
Tanü mezüngbuba semifinal asaya nung Barak teloki goal 3-0 agi Head Hunters (Territorial Army) telok madak takok ngua liasü.
Tanü asaya mezüngbuba minute 45 nung telok anapronglai goal kata magütsüteti kasa jenjang nung asaya saka asaya tanabuba shilem nung, asaya tenzüker minute 71 buba nung Kivi Zhimomi-i 1 buba goal agüja, par Barak telok temaba jenjang kümdaktsü.
Külem asayar, Keneisedelie-i asaya tenzüker minute 76 buba nung 2 buba goal agüja, par Barak telok maneni temaba jenjang nung ajungkettsü.
Asaya tenzüker minute 79 buba nung Mechei Vikho-i yanglutsü pass ball agizüka, Chuba-i par Head Hunters telok tenüng nung goal agütsütsü maongka angu saka pai ball goal telungi meyokteti maongka tajung amajok nung süidaktsü.
Tesülen, asaya tembangtsü mapang nung Rhitsho Mero-i 3 buba aser takokba goal agüja, par Barak telok tan asayamong semifinal-i anir ai.
Ano külen, Kuki United Football Club aser Naga Football Club na tsüngda tan asayamong 2 buba semifinal tan November ita 28 nikongtsütsü 2:00 ako nungi tenzüka asayatsü renema lir.