Barak FC & Forerunners telok NSF semifinal-i iogo

Kohima, October 18 (TYO): Defending champions, Barak Football Club aser Forerunners 4th NAP telok nati takok ngua, tang tasayadak 17 buba NSF Martyrs’ Memorial Trophy asayamong semfinal asayatsü jenjang tanü, Mongolbar nü ajangzükogo.
Tanü tasembuba quarterfinal nung Barak teloki goal 4-1 agi Tiema-Khe Kidima telok tsükdaktsü.
Aloumei-i asaya tenzüker minute 22 buba nung 1 buba goal agütsüba sülen Salu-ia minute 34 buba nung goal 1 agüja, par telok goal 2-0 agi temaba jenjang nung ajungkettsü.
Tiema-Khe captain, Sürosül Pucho-ia minute 47 buba nung goal 1 agüja, par telok jenjang tajungba kümdaktsü.
Ajisüaka, asaya tenzüker minute 50 aser 85 buba nung Nampi aser Rhitso Mero nati goal kaka agütsüba yong par Barak teloki tanü asayaji kokadok.
Forerunners telokia tan asayamong nung mezüngsüa shilem agir, P. Vizheto FC, Niuland telok madak goal 3-1 agi pezübuba aser tatembangba quarterfinal asaya akok.
Nito-i asaya tenzüker minute 43 buba nung goal 1 agüja, par P. Vizheto telok temaba jenjang nung ajungkettsü.
Ajisüaka, Nyethong Rengma-i asaya mezüngbuba shilem indang mapang tali atazüktsüba mapang nung free kick takok ngua metsüokja goal-ji meyiptsüba den külem asayar, Medoneituo aser Kezevituo nati minute 77 aser 85 buba nung goal kaka agüja, par Forerunners telok nem goal 3-1 agi takok ngudaktsü.
Tanü takok angur telok, Barak aser Forerunners telok na tsüngda tanabuba semifinal asaya tan October ita 20 nü asayatsü.
Ano külen, Nagaland Police (Red) aser Nagaland Police (Blue) telok nati tan October ita 18 nikongtsütsü 1:00 ako nungi tenzüka, tan asayamong mezüngbuba semifinal asayatsü renema lir.