Barak FC-i 21 buba Classic Cup takok marok agizükogo

Classic Cup 2015 champions, Barak FC asayartemi takok marok amer agiba noksa ka yangi angur. (Kohima, November 20)

Dimapur, November 20 (TYO): Defending champions, Barak Football Club, Peren-i 21 buba Classic Cup 2015 asayamong takok marok tanü Hokolbar nü agizükogo.

Atazüktsüba asaya mapang tembang tashi nung Barak aser HQ IGAR(N) telok napronglai goal 1-1 agüja draw angu saka tie-breaker metsütepba sülen Barak teloki goal 3-2 agi tanü final asaya akok.

1. Chizo-i par HQ IGAR (N) telok asoshi asaya mezüngbuba shilem nung goal 1 aser Barak asayar Mayoshing Khongriwo-ia asaya tanabuba shilem nung goal 1 agütsüba yong par telok anapronglai kasa jenjang ngua liasü.

Yaküm, 2014 küm ayongba Classic Cup asayamong takok marok agizükba densema, Barak teloki tan agi Classic Cup asayamong takok marok 2 buba agizüker lir.

Barak teloki tanü takok anguba sülen takok marok aser kulikaket den külemi, senpet sen 1,50,000 agizük.

Asayamong tayonger, Classic Club Kohima (CCK)-i tarutsü mapang nung asayamong takok ngua ayongtsü aser lokti nem tajangzük bener arutsütsü mapatong inyaktsü nung yariteptsü nükjidong nung HQ IGAR (N) teloki tanabuba jenjang anguba senpet sen 80,000 CCK telok nem tenlaba osanga jangjaogo.

Tanü assaya nung Barak asayar, Tingnyek Konyak-i ‘Swift movement of the Match’ ngua senpet sen 2500 aser HQ IGAR (N) asayar, K. Chizo-i ‘Hero of the Match’ ngua senpet sen 3000 agizüka liasü.

Ano külen, Lhisemia YO asayar, Dziesedilhou Yhome; Naga FC asayar, Nampibou Renta aser Nagabazar YO asayar, Kevikelie Pienyii nunger tan asayamong nung ‘Players of the Tournament’ shima par asemprongla Guwahati-i anir oa idakji asayaba Indian Premier League (IPL) football asaya reprangdaktsütsü renemba osang ka CCK telokia metetdaktsüogo.

Tanü asayamong shibangba sentong nung tongti tesemdanger, Nagaland Environment, Forest & Climate Change Minister, Dr. Neikiesalie (Nicky) Kire-i takok angurtem nem sempet aser senpet sen  amoktsü.

Tan asayamong nung individual shilem indang senpet agizüker tarensen:

*   Best goalkeeper: Pesiudibe Zeliang (Barak FC)- Rs. 5000

*   Best Defence: Y. Sunder Singh (HQ IGAR (N)- Rs. 5000

*   Best Midfield: Khuanjang (Head Hunter)- Rs. 5000

*   Highest Scorer: Shamba Samson (Fraternity FC) 9 goals- Rs. 5000

*   Player of the Tournament: Yami Yongbah (Barak FC)- Rs. 10,000.