Barak FC NSF Martyrs Trophy final-i iogo

Kohima, October 12 (TYO): Angami Students’ Union-i ‘”Goal for Peace” omen nung ajemdaker ayonga tang tasayadak aliba 16 buba NSF Martyrs’ Memorial Trophy nung taoba küm Champion, Barak Football Club, Peren-i 2-0 agi Manipur, Senapati FC madak takok ngua final-i iogo.
Champion ka ama parnoki semi-final asaya tetenzükdang nungi kanga junga asayaa liasü aser minute pongububa nung Nyithung Magh-i talang nungi ball metsüoktsü saka Senapati FC goalkeeper Prem Hmar-i kanga junga nokdang. Ano minute 17 buba nunga Nyithung Magh-i Prem tejakleni atuba ngur goal tsütsü ball metsüoktsü saka defender Irung-i nokdang.
Senapati FC-i iba asaya nung kecha mesüteti kümadok. Asaya tepiyong nung parnoki Barak Football Club tsütsüi ball khen dang bener lutet saka goal meyoktet.
Minute 41 buba nung Senapati asayar ka dak teben nung tangshiba ajanga Barak FC pur nem penalty metsütsü maongka agütsü. Iba penalty ji Barak captain Tingyek Konyak-i metsüa Barak team asoshi mezüng goal yok. Ajisüaka referee-i ashibaji tai ta shia halftime sülen nungi Senapati FC-i joko masayatsü ta mapang tatsüka atsütepa liasü.
Saka asayamung ayonger den technical committee aser match commissioner nungeri angatetepdaktsüba sülen tanaben asayatsü tenzük.
Asaya temer minute pongu apuloktsüba mapang nung Barak team nungi asayar ka melena Tepongmeren Kichu ait aser Aloumei Panmei agütsüba pass ka ajanga pai ano Barak team atema goal ka yoksema 2-0 agi parnoki takok angu.
Iba asaya nung Principal Secretary to the state Chief Minister & Finance Commissioner, Temjen Toy-ia densema sentong mera ketdaktsü.
Tanabuba semi-final Khulioh King FC Tuensang vs Pro-Streax United Dimapur na asüng, October 13 nü 1:30 ako nungi tenzüka asayatsü.