Barak telok 22 buba Classic Cup semi-i iogo

Kohima, November 22 (TYO): Defending champions, Barak Football Club (FC) teloki par quarterfinal asaya koka, tang tasayadak 22 buba Classic Cup football asayamong semifinal asayatsü jenjang tanü, Mongolbar nü ajangzükogo.
Tan asayamong mezüngbuba quarterfinal asaya nung Barak teloki goal 8-0 agi Addax Football Club madak ajemshia takok angu.
Asaya tetenzüklen nungi asaya amokbanga asaya, Sakutemjen-i yanglutsüba cross ball tajung agizüka, Rhitsho Mero-i pa tekolak agi tongokja, asaya tenzüker minute 8 buba nung par Barak telok asoshi 1 buba goal agütsü.
Mero-isa Sakutemjen-i yanglutsüba pass ball agizüka, minute 10 buba nung 2 buba goal agüja, par telok temaba jenjang nung ajungkettsü.
Asaya tenzüker minute 27 buba nung Addax telok jenjang tajungba kümdaktsütsüsa maongka angu saka Neikethozo-i metsüoktsüba ball tezüleni aoba yong par teloki goal takok ngua magütsüteti maongka tajung amajok nung süidaktsü.
Tesülen, asaya tenzüker minute 36 buba nung Sakutemjen-isa yanglutsüba pass ball agizüka, Kekhrie Tsira-i par telok asoshi 3 buba goal agütsü aser asaya mezüngbuba shilem tembangtsü minute 1 shi anünga alidang, Mero-i par Barak telok asoshi 4 buba goal agüja, pa tan asayamong nung hat-trick yanglur asayar 9 buba aküm.
Tsira-isa asaya tanabuba shilem tenzüker 1 buba minute nung 5 buba goal agütsü aser pa den yaritepa, Sanyem Salym-i minute 58 buba nung 6 buba goal agütsü.
Tsira-i maneni minute 64 buba nung 7 buba goal agüja, pa tan asayamong nung hat-trick yanglur asayar 10 buba aküm aser K. Salu Kulim-i minute 75 buba nung 8 buba aser takokba goal agüja, par Barak telok nem takok ngudaktsü.
Ano külen, Head Hunters telok aser Elite Football Club telok nati asüng, Bodbar nikongtsütsü 2:00 ako nungi tenzüka, 2 buba quarterfinal asayatsü renema lir.