Barak telok Classic Cup champions 3 ben buba akümer

22 buba Classic Cup football asayamong champions, Barak FC teloki final asaya nung tongti tesemdanger, Khriehu Liezietsu aser asaya ketdangsertem den aroki agiba noksa ka yangi angur. (Kohima, November 30)

Kohima, November 30 (TYO): Nagaland kübok Peren district nung tentetba Barak Football Club (FC) teloki final asaya koka, 22 buba Classic Cup takok marok tanü, Bodbar nü agizükogo.
Par teloki tan agi Classic Cup takok marok 3 buba atonga agizüker lir.
Classic Club Kohima (CCK) teloki ‘Dream courage to achieve’ omen nung ajemdaker asayaba asayamong final asaya nung Barak teloki goal 2-1 agi Kuki United telok tsükdaktsü.
Champions teloki temaba jenjang angutsüsa asaya tenzüker minute 13 buba nung maongka angu saka par asayar, Kivi Zhimomi-i metsüoktsüba ball Kuki goalkeeper, Michael Kuki-i ayong ayonga puadokba yong goal agütsütsü moangkaji amajok nung süidaktsü.
Ajisüaka, Kivi-isa asaya tenzüker minute 37 buba nung goal takok ngua agüja, par Barak telok temaba jenjang nung ajungkettsü.
Kuki asayartemia asaya tanabuba shilem nung kanga meranga asaya aser par asayar, Khaigin-i minute 54 buba nung goal agütsütsü maongka angu saka pai metsüoktsüba ball goalpost tezüleni oadok.
Tesülen, Barak asayar, Keneisedelie aser Kivi nati ball kanga junga amshia, pass tajung ka agütsüba sülen külem asayar, Rhitsho Mero-i minute 58 buba nung par telok asoshi 2 buba goal agütsü.
Asaya tembangtsü minute 3 shi anünga alidang Kuki skipper, Ginkholen-i goal agüja, par telok jenjang tajungba kümdaktsü saka tanüngba asaya mapang nung par teloki tanabuba goal memeyiptsütetba yong tanü tamakok ajurutsüsa aküm.
Tanü takok anguba sülen Barak teloki takok marok o kulikaket den senpet sen lakh 1.5 agizük aser Kuki teloki tanabuba jenjang takok marok den kulikaket o senpet sen 80,000 agizüka liasü.
Individual shilem nung Kuki asayar, Elminhao-i Player of the Tournament; Head Hunters nungi Ayiezo Mere-i Best Defender; Barak nungi Peisuidibe Zeliang-i Best Goalkeeper; goal 8 tashi agütsüsang, Barak asayar, Rhitsho Mero-i Highest Scorer; Barak nungisa, Keneisedelie-i Best Mid-fielder aser Addax FC nungi Khriekethozo Keretsü, MT Youth Club nungi Hekato Ayemi aser Naga FC nungi Akuo-o Ciesotsu nungeri Most Promising Players sempet/senpet agizükba osang jangjaogo.
Nagaland Parliamentary Secretary, Youth Resources & Sports, Music Task Force & State Lotteries, Khriehu Liezietsu-i takoker ajunga nem sempet/senpet agüja liasü.