Barak valley-i Assam bandh magizük ; Tanüngba tesem ajak mokdang

Silchar, Mongputeni (October) 23 (Agencies): Barak valley nung Citizens (Amendment) Bill, 2016 anema Assam mokdangba sentong magitet.
Krishak Mukti Sangram Samiti (KMSS), Assam Jatiyatabdi Yuva Chatra Parishad (AJYCP)-i anir telok 40-i ayongzüba sentong Barak valley nung alirtemi magizük.
Mongulbarnü Silchar jila aser Karimagnj o Hailakandi tesemtem nung akhi ama dang traffic mesemi nungzütep. Dokan aser shishilembadak ajak lapok aser sorkar mapa inyakertemi office-i ao.
Tanü tensa meraksadaktsütsü atema tanep 6:00 ako nungi security akangshia liasü.
Silchar tezülen Citizenship Bill anema noktaker Assam Indigenous People’s Protection Forum züngsem 10 shi kati garitem noktangtsü merang saka security force temi mapang shitak nung azüoktetba ajanga parnoki minute 15 shi ka dang lungkak aita liasü, ta Cachar district ketdangsertemi ashi.
All Cachar, Karimganj-Hailakandi Students’ Association founder president, Pradip Dutta Roy-i ashiba agi, “Barak valley nung alirtemi iba Assam bandh magizüker. Iba sentog ya Assam nung Bengali oshi jembirtem anema masü saka state taginüba nung tetsükdaktsü bentsür arutsü. Ni iba bandh aitsür aser Assam sorkaria iba bandh posema menungittsü ayongzükogo.”
Barak valley kübok district pezü dak alaka Assam kübok tanga district tem nungbo tanü mokdang takok ngua agi.
Külen, Asom Gana Parishad (AGP)-ia Mongulbarnü Citizenship Amendment Bill anema Guwahati nung lokti sentong tulu ka ayongzüka agi.
Parnoki BJP-i aniba Centre sorkar dang Assam Accord akümtsübura aser Assam nung alirtem hao ta züngokra iba bill dustbin-i yokang ta takhangba agütsü.
Assam Accord ya AGP atema “Gita, Bible aser Quran” lir aser lisopurtem temeten kümzüka ayutsü atema mapa küma inyaktsüla, ta AGP President Atul Bora-i tanü ashi.
Tanü AGP-i Latasil playground nungi lungkak aitba sentongji tenzük aser Chandmari tesem tashi agiyonga ao.