Baramulla amaktsü meranger ana jangjaogo

New Delhi, October 03 (Agencies): Deobar aonung tesü North Kashmir, Baramulla nung aliba Indian Army camp amakertem kiralongrar parnok trok rongnungi kiralongrar anabo jangjaogo, ta osang ka ajanga metetdaktsü.
Hombarnü osangbenertem den jembidang Special Operations Group-i, 46 Rashtriya Rifles camp amaker anaji arishi küm 23, Haneef (Hilal) aser Ali (22) na lir ta jangjaogo, ta metetdaktsü.
Tenaprongji Pakistan nunger lir aser Masood Azhar’er kiralongrar telok, Jaish-e-Mohammad (JeM) nung züngsemtem lir, ta parnokisa metetdaktsü.
BSF Inspector General (Kashmir), Vikash Chandra-i ashiba agi, kiralongrartem ket nungjagi GPS set ka, compass ka, süngzü mejepdangba ka aser injang kar angu.
Iba amakba nung Border Security Force (BSF) Constable, Nitin Kumar tepset aser Constable Parminder yirua liasü.
Yasüng 10:30 ako meta kiralongrartemi army camp junga memakteti jena aoba sülen security sepaitemi parnok mita bushi tenzük, aser tanep iba operation ji tembangogo.
Janbazpora nung aliba 40 battalion BSF sepaitemi melung malemtsüsa nisung kar senzüba angu, iba sülen kiralongrartem camp telungi ait südi ta bilema parnoki injang kahloktsü tenzük, ta tanga osang ka ajanga ashi.
Injang ola angashia Army camp anasa aliba 46 Rashtriya Rifles sepaitemia injang akah tenzük. Minute 90 shi injang sashia kahloktsüba sülen illuminators amshia kiralongrartem bushi saka kiralongrar ajak jenshir liasü, ta kasa osang ajanga ashi.