Barcelona-i 28 buba Copa del Rey takok marok agizükogo

Barcelona, May 23 (Agencies): Spain nung tentetba tongti football telok, FC Barcelona-i goal 2-0 agi Sevilla telok madak final asaya koka 2016 Copa del Rey takok marok yashi, Deobar nü agizükogo.
Barcelona teloki tan agi Copa del Rey takok marok 28 buba agizüker lir.
Yashi asaya mezüngbuba shilem tembangtsü mapang nung Javier Mascherano-i red card temerenshi ngua asayadak nungi tuguadoktsüsa akümba den külemi, par telok asoshi goal timba, 59 tashi agütsüsang, Luis Suarez tetsüng yirua masayatettsüsa akümba ajanga Barcelona telok indang jenjang mejungi aküm.
Ajisüaka, Sevilla asayar, Ever Bangega-i Neymar alangdakja asayadak toktsüsa akümba ajanga asaya tembangtsü mapang tashi nung par telok anaprongla kasa jenjang küma liasü.
Barcelona asayartemi extra time, minute 30 nung kanga meranga asaya aser extra time asayatsüren tenzüker minute 6 buba nung Lionel Messi-i yanglutsüba pass ball kanga junga agizüka, Jordi Alba-i goal 1 agüja par Barcelona telok temaba jenjang kümdaktsü.
Tesülen, asaya tembangtsü second ishika anünga alidang Neymar-i Messi-isa yanglutsüba pass ball agizüka, par Barcelona telok asoshi 2 buba aser takokba goal agütsü.