Barcelona telok King’s Cup final tongogo; Suarez nem temerenshi agütsüba nung atsüanem lidaktsünür

Barcelona, February 08 (Agencies): Mongolbarnü Camp Nou nung Barcelona FC aser Atletico Madrid FC tsüngda semi-final second leg asayaba nung telok anaprongi goal kaka agütsü aser Barcelona telok King’s Cup final-i ai.
Iba asaya nung Barcelona telok nungi Luiz Suarez-i goal ka agütsü aser pa asaya tom nung tugudaktsü. Iba ajanga pa final nung masayatettsü.
Asaya tenzüker minute 43 buba nung Lionel Messi ajanga ball pass asüba, Uruguay nunger Suarez-i agizüka Atletico indang goal nung metsüoktsü.
Asaya tembangtsü minute 10 lia Kevin Gameiro penalty ka metsü, saka iba ball goal post nung tsükdaker tanaben meyipa adok saka mapang tatsüka lir Antoine Griezmann-i pass asüba ball, Kevin-isa yoktet.
Iba asaya nung Barcelona telok nungi defender, Sergi Roberto-a asaya tom nung tugudaktsü aser pa kasa final nung masayatettsü.
Atletico nungi Yannick Carrasco-a asaya tom nung tugudaktsü.
Iba asaya tenzüker minute 90 buba nung Suarez-i Atletico telok nungi asayar Koke dak teküttsü agi asetba ajanga asaya matemdang tugudaktsü.
Barcelona teloki May nung Alaves mesüra Celta Vigo den final asayatsü.
2006 küm nungi tenzüka Nou Camp nung asayaba nung Atletico teloki khena koka mali.
Barcelona aser Atletico Madrid tsüngda semi-final second leg asayaba mapang Luis Suarez nem Red Card agütsüba asoshi temepishiba ka agütsüogo.
Iba kasa asaya nung Barcelona telok nungi Sergio Busquets nem Yellow Card agütsüba asoshia temepishiba agütsütsü, ta Barcelona indang official website ajanga metetdaktsü. Sergio Busquets-a iba ajanga par telok final asayatsü aliba nungi nokdanger.
“Ball rakzüktsü merangba mapang nung Suarez-i asayar yimya masüba nung tangar asayar dak teka agi kongshiba ajanga pa nem iba temerenshi agütsü, aser free-kick metsütsü aliba mapang Busquets-i ball metsüdokba ajanga pa nema iba temerenshi agütsü,” ta iba asaya nung Referee, Jesus Gill Manzano-i osangbener dang ashi.
Asayaba moapu nung ball talila aliba ajanga Busquets-i ball ka ji metsüdok, ta Barcelona-i ashir.
Koke-i talitapong sayuba ajanga kü nem iba temerenshi agütsü, ta Suarez-ia ashi.