Barcelona telok UEFA Champions League quarterfinal-iogo

Arsenal telok madak goal 3-1 agi takok ngua asayaba Champions League asaya nung Luis Saurez, Lionel Messi aser Neymar nungeri par Barcelona telok asoshi goal 1 agütsüba sülen pelatepba noksa nung angur. (Barcelona, March 17)

Barcelona, March 17 (Agencies): Neymar, Lionel Messi aser Luis Saurez nungeri kanga junga shilem agiba ajanga par Barcelona FC teloki goal 3-1 agi Arsenal telok madak takok ngua ajak agi points 5-1 agi temaba jenjang ngua tang tasayadak UEFA Champions League asayamong quarterfinal-i yashi, Bodbar nü iogo.
Yashi asaya nung Neymar-i mezüngbuba goal agüja par Barcelona telok temaba jenjang nung ajungkettsü saka Arsenal asayar, Mohamed Elneny-i asaya tanabuba shilem tetenzüklen goal 1 agüja par telok anaprong kasa jenjang kümdaktsü.
Tesülen, Saurez-i asaya tembangtsü minute 25 shi anünga alidang par telok asoshi 2 buba goal agüja par telok temaba jenjang nung ajungkettsüba sülen Messi-i asaya tembangtsü minute 2 anünga lia 3 buba aser takokba goal agüja par Barcelona telok nem takok ngudaktsü.
Tan goal 3 agütsübaji densema, taküm küm tenzüker tanü tashi nung Neymar, Saurez aser Messi nungeri aroki lungjemer par Barcelona telok asoshi ajak agi goal 106 agütsüogo.
Tan takok anguba densema, Barcelona teloki tan asayamong nung asaya 9 buba atonga koka, asayamong balala nung ajak agi asaya 38 buba atonga akoker telok kümogo.
Ano külen, tan tamakok anguba ya densema, Arsenal teloki tanü tashi nung asaya 8 nung asaya 1 dang kokteta tan asayamong nung joko toktepa shilem magitettsüsa jenjang tamajung nguogo.