Barcelona:Lendong nokdangtsü mechi kiralongrar tongti aputsü bushir

August 19, 2017 nü Barcelona nung aliba Hospital del Mar nung Spain Chuba Felipe aser Chubatsür Letizia nati  yirua alirtem semdangdang agiba noksa angur.

Madrid, August 19 (Agencies) : Spain nung kiralongrartemi lendong agüja nisung 14 tashi taküm samatsüba aser nisung noklang dak tema yirutsüba sülen Europe rangben nung ano iba lendong agütsür rongnung tongti ta bilemba nisung ka aputsü asoshi maneni bushidar.
Police temi tang Morocco nung soa inteba nisung ka tenüng agi Younes Abouyaaqoub bushidar. Ashiba agi pa ya Barcelona nung Las Ramblas boulevard tesem nung Brihostibarnü van gari ka sünga kiralongrartem mener arua nisung 13 tashi taküm samatsüba lendong dak sentakba nung aputsü bushir. Iba anogo lendong mezüngbuba nungji nisung 13 tashi yirua liasü, ta osangbenertemi ashi.
Mezüngbo Barcelona nung lendong agütsütsü tasa asar tongti nisungji arishi küm 18 tain, Moussa Oukabir lir ta temulung melemi liasü. Pa-a Cambrils jila nung lendong tanabuba atalokba mapang police-i khaseter nisung pungu rongnung dena liasü, ta Hokolbarnü ketdangsertemi ashi.
Cambrils jila nung kiralongrartemi van gariji nisung mazüngi jajaba lenmang ka nung nisung aika lia nungpoka aiba mapang Oukabir-a kiralongrar Said Aallaa aser Mohamed Hycham na den külemi khaset aser iba kasa lendong nung tantsür ka asüba den ano nisung pungu yirusem.
Iba lendong nung khasetba kiralongrar ana tashi ano mejangjati lir.
Police-i ashiba agi, item lendong ana atalokba nung temulung melemteti aliba kiralongrar temi shitakbabo bomb tesashi poklokja takoksa tulu ajurudaktsütü sentong liasü ajisüaka parnoki bena aliba bomb temji parnoki bilemba mapang dang nungi tera tekaraba apokba ajanga parnok sentong amajok aküm.
Spain nung adokba osangkaket ka ajanga ashiba agi, Catalonia nung aliba police-i parnok Abouyaaqoub aputsü bushir. Pa ya tan atalokba lendong anaprong nung sentong atonger tongti nisungji lir ta angatetogo. Parnoki ano raliwalirtemi kanga sapuba yimti nung lendong agütsütsü tsübuba agi ibaji nokdangtsü asoshi pa bushiba maparen ya tenzük.
Arishi küm 22 tain, Abouyaaqoub ya Ripoll jila nung liasü. Iba jila ya Barcelona anüdoklentip tsütsü lir.
Tesüiba mapang Abouyaaqoub den külemi class tsür kati ashiba agi, paji “kanga nema matang” nisung ka liasü aser pai shinga nema pa jangja metetdaktsünü.
“Pa kanga ajemalu nisung aser kodanga lendong memena. Iba ochi o ya nenok dang ashitsüji tamamangtsü amai kechiba sür pai iba ama lendong agütsütsüji shingaia mamanger,” ta lai ashi.
Tang tashi nung Ripoll aser Alcanar tesemtem nungi nisung asem pua lir. Par asem ya Morocco aser Spain lisopurtem lir, ta osangbenertemi metetdaktsü.
Bodhbarnü Alcanar nung aser Brihostibarnü Barcelona o Cambrils tesemtem nung atalokba lendongtemji sentong kasa den sentaktepa lir, ta ketdangsertemi ashi.