Barkha Shukla BJP nung denogo

New Delhi, April 22 (Agencies): Congress lenir, Barkha Shukla Singh-i Rahul Gandhi anema jembiba sülen la party nungi anentsü, aser tanü Honibarnü la Bharatiya Janata Party nung denogo.
Taoba mapang Delhi Commission for Women tongti, Barkha-i tanü nikongdang BJP national tatong Tir aser Delhi in-charge, Shyam Jaju ajurua liasü.
Ni party nung jenjang ka angutsü rangloker party nung adener masü, ta lai ashi.
“Ni BJP nung adenba ya election nung tokteptsü mesüra jenjang kar angutsü nükjidong nung adener masü, saka kü nem nungloktsüba mapatem meranga inyaktsü atema adener,” ta lai osangbenertem dang ashi.
Laisa tesüiba küm asem nung Ato kilonser, Narendra Modi’er mapatong balala ajanga temelenshi bener aruba atema tenüngsang agütsü.
Brihostibarnü lai Rahul Gandhi aser Delhi unit Tir, Ajay Maken na anema jembiba sülen anogo ka lir la party nungi küm trok anentsü, aser tanü lai BJP nung adener.
Barkha-i, “Party anitsü atema Rahul Gandhi ji metetemsü,” ta ashi, ajisüaka lai party nung manentsü ta nangzüka liasü.
Laisa, “Congress ya Gandhi’er kibong meyong kiojen ka masü,” ta aija liasü.
Tamalena lai, Rahul Gandhi-i party lenirtem majurur aser party tentet nung onüktem atema meinyaker, ta aija liasü.